بھٹکل 7 / مارچ  (ایس او نیوز) بھٹکل کی تاریخی سرابی ندی کی گندگی اور غوثیہ اسٹریٹ کے ڈرینیج پمپنگ اسٹیشن سے نشیبی علاقے کے رہائشیوں کو درپیش مسائل حل کرنے کے لئے سرگرم 'سرابی ہوراٹا سمیتی کے ایک وفد نے بطور یاد دہانی اسسٹنٹ کمشنر (اےسی ) ڈاکٹر نئینا سے ملاقات کی ۔

کمیٹی نے حال ہی میں اس مسئلے پر احتجاجی ریلی کے دوران سونپے  گئے میمورنڈم کی کاپی اے سی  کو پیش کرتے ہوئے مطالبہ کیا کہ سرابی ندی کو پاک کرنے اور اس کی گہرائی بڑھانے کے لئے مٹی اور پتھر وہاں سے نکالنے پر فوری توجہ دی جائے ۔ اس کے علاوہ اوپری علاقے کے گندے پانی کو شمس الدین سرکل سے نشیبی علاقے تک  لانے غوثیہ اسٹریٹ پمپنگ اسٹیشن تک پہنچانے کا جو منصوبہ بنایا گیا ہے اس پر ہرگز عمل نہ کیا جائے ۔
    
اس کے جواب میں اے سی  نے کہا کہ اس ضمن میں تیکنیکی ماہرین کی ایک کمیٹی تشکیل دی گئی ہے ، جو ایک آدھ ہفتے کے اندر غوثیہ اسٹریٹ ویٹ ویل کی قوت برداشت اور نشیبی علاقے کی طرف پانی موڑنے سے ممکنہ نقصان اور اس کے تدارک کے سلسلے میں اپنی رپورٹ پیش کرے گی جس کے بعد ضروری اقدام کیا جائے گا ۔ 

   اس موقع پر کمیٹی کی طرف سے اے سی کو  آگاہ کیا گیا کہ نشیبی علاقے اور غوثیہ اسٹریٹ کی طرف مزید گندے پانی کا رخ موڑنا کسی بھی حالت میں درست نہیں ہے ۔ اس سے معاملہ  مزید  پیچیدہ ہو جائے گا  اور علاقے میں مقیم افراد کی  قوت برداشت سے  باہر چلا جائے  گا ۔ اس لئے ضروری ہے کہ اسسٹنٹ کمشنر بنفس نفیس خود ہی غوثیہ اسٹریٹ اور ڈارنٹا  علاقہ میں  پہنچ کر وہاں کی بدحالی کا جائزہ لیں اور اسے درست کرنے کے لئے اقدامات کریں ۔ 
    
وفد کی اس درخواست کو قبول کرتے ہوئے اسسٹنٹ کمشنر نے وعدہ کیا کہ چند دنوں کے اندر ہی وقت نکالتے ہوئے ٹی ایم سی چیف آفیسر کو ساتھ لے کر وہ متعلقہ مقام پر پہنچیں گی اور جائزہ لینے کے بعد مسائل کے حل کے لئے ضروری اقدامات کریں گی ۔
    
اے سی سے  ملاقات کرنے والے ہوراٹا سمیتی کے  وفد میں مولوی انجم گنگاولی ندوی،ڈاکٹر محمد حنیف شباب،  عبدالسمیع میڈیکل،  کے ایم اشفاق، محمد حُسین،   مصطفیٰ عسکری ، شمعون حاجی فقیہ، مبشر ہلارے، ، مولانا ارشاد ندوی و دیگر موجود تھے ۔