حیدرآباد، 7؍جنوری (ایس او نیوز؍ایجنسی) ہندوستان کی اسٹار ٹینس کھلاڑی ثانیہ مرزا نے پیشہ ورانہ ٹینس کیریئر سے ریٹائرمنٹ کا اعلان کر دیا ہے۔ انہوں نے بتایا ہے کہ وہ آئندہ ماہ دبئی ٹینس چیمپئن شپ میں کھیلیں گی اور یہ چیمپئن شپ ان کے کیریئر کا آخری ٹورنامنٹ ہوگا۔ خیال رہے کہ دبئی ٹینس چیمپئن شپ 19 فروری سے شروع ہوگا۔ ثانیہ مرزا اس ٹورنامنٹ میں آخری بار کھیلتی نظر آئیں گی۔ 36 سالہ ثانیہ ڈبلز میں عالمی نمبر ایک کھلاڑی رہ چکی ہیں۔

ثانیہ مرزا نے اپنے کیرئر کے دوران ڈبلز کے 6 گرینڈ سلیم خطاب اپنے نام کئے ہیں۔ انہوں نے اپنے ریٹائرمنٹ کے منصوبہ کی تصدیق کرتے ہوئے کہا کہ وہ آئندہ ماہ دبئی میں ہونے والا ڈبلیو ٹی اے 1000 ایونٹ ان کا آخری میچ ہوگا۔

ثانیہ مرزا نے پہلے بتایا کہ انہوں نے گزشتہ سال ڈبلیو ٹی اے فائنل کے بعد ہی ریٹائر ہونے کا ارادہ کیا تھا لیکن دائیں کہنی کی چوٹ کی وجہ سے یو ایس اوپن اور باقی ٹورنامنٹ سے نام واپس لینا پڑا۔ انہوں نے کہا کہ وہ اپنی شرائط پر زندگی گزارنے والی شخص ہیں۔ یہی وجہ ہے کہ وہ چوٹ کی وجہ سے باہر نہیں ہونا چاہتی تھیں اور دبئی ٹینس چیمپئن شپ کے بعد ریٹائر ہونے کا ارادہ رکھیتی ہیں۔

اس وقت ثانیہ مرزا کی عالمی رینکنگ 24 ہے۔ ثانیہ مرزا تقریبا ایک دہائی سے دبئی میں ہی مقیم ہیں، امارات سے ہی اپنے اس کھیل کو الوداع کریں گی، جہاں انہوں نے کئی مقابلوں میں حصہ لیا ہے۔ چار سالہ اذہان ملک کی ماں ثانیہ مرزا نے حال ہی میں دبئی میں ٹینس اکیڈیمی کا آغاز کیا تھا۔ انہوں نے کہا تھا کہ وہ ٹینس کو پھیلانے اور لوگوں کے گھروں تک پہنچانے کی کوشش کر رہی ہیں۔