پیانگ یانگ، 15/جون (آئی این ایس انڈیا) شمالی کوریا کے سپریم لیڈر کی بہن نے جنوبی کوریا کے خلاف فوجی کارروائی کی دھمکی دی ہے۔ اس دھمکی کے بعد جزیرہ نما کوریا پر کشیدگی میں اضافے کا امکان پیدا ہو گیا ہے۔

کمیونسٹ ملک شمالی کوریا کے سپریم لیڈر کم جونگ اُن کی بہن کم یو جونگ کی عسکری ایکشن سے متعلق دھمکی کے بعد جنوبی کوریائی حکومت نے فوری طور پر سکیورٹی میٹنگ طلب کر لی۔ اس میٹنگ کے فیصلوں کی تفصیلات فی الحال سامنے نہیں لائی گئی ہیں۔

شمالی کوریا نے جنوبی کوریا کے ساتھ ہر قسم کے تعلقات منقطع کرنے کا بھی کہا ہے۔ اس کے ساتھ شمالی کوریا نے سرحدی مقام کیسونگ میں قائم اپنا رابطہ دفتر بھی مسمار کر دیا ہے۔

کم یو جونگ نے اپنی دھمکی میں یہ واضح نہیں کیا کہ ان کا ملک اپنے حریف ہمسایہ ملک کے خلاف کس نوعیت اور کتنی شدت کا ملٹری ایکشن لینے کی سوچ رکھتا ہے۔

تجزیہ کاروں نے اس بیان بازی کے بعد جزیرہ نما کوریا پر تناؤ اور کشیدگی میں اضافے کا امکان ظاہر کیا ہے۔ کمیو جونگ کے بھائی اور سپریم لیڈر کم جونگ اُن نے اپنے ایک حالیہ بیان میں امریکی حلیف ہمسایہ ملک کو دشمن قرار دیا تھا۔

کم یو جونگ کے دفتر سے جاری ہونے والے بیان میں کہا گیا کہ سپریم لیڈر، پارٹی اور ریاست نے جو اختیارات انہیں تفویض کیے ہیں،ان کی روشنی میں ہتھیاروں کے نگران محکمے کو ہدایت کی گئی ہے کہ وہ اگلے اقدام کے لیے تیار رہے۔