سوڈان کو پابندیوں کی فہرست سے نکالنے میں وقت لگے گا: امریکا
دبئی،4/نومبر (ایس او نیوز/ایجنسی) امریکا نے باور کرایا ہے کہ سوڈان کو 'دہشت گردی' کی سرپرستی کرنے والے ممالک کی فہرست سے نکالنے میں ابھی وقت لگے گا۔ دوسری طرف سوڈان کی نئی عبوری حکومت نے توقع ظاہر کی ہے امریکا خرطوم کو دہشت گردوں کی پشت پناہی کرنے والے ممالک کی فہرست سے جلد نکال دے گا۔
سوڈان کی سرکاری نیوز ایجنسی'سونا' کے مطابق وزیر خارجہ اسماء عبد اللہ نے امریکا کے قائم مقام سفیربرائن شوکان سے ملاقات کی اور امید کی ہے کہ امریکی حکومت جلد ہی سوڈان کو دہشت گردی کی سرپرست ریاستوں کی فہرست سے نکال دے گی۔
امریکی سفیر برائن شوکان نے کہا کہ سوڈان کو دہشت گردی کے ریاستی سرپرستوں کی فہرست سے نکالنے کی کوشش کی جارہی ہے ، جس میں وقت لگے گا۔
وزیر نے اس بات پر زور دیا کہ سوڈان میں نئی حکومت دونوں ممالک کے مابین دوطرفہ تعلقات کو مستحکم کرنے اور انہیں وسیع تر افق کی طرف لے جانے کی پوری کوشش کرے گی۔
سوڈانی وزیر اعظم عبداللہ حمدوک نے واشنگٹن سے مطالبہ کیا ہے کہ سوڈان کو دہشت گردی کی فہرست سے نکالیں۔
اقوام متحدہ کی جنرل اسمبلی سے خطاب کرتے ہوئے حمدوک نے کہا تھا کہ سوڈان کے عوام دہشت گردی کے حامی یا سرپرست نہیں تھے بلکہ سابق حکومت اس کی ذمہ دار تھی۔
انہوں نے مزید کہا کہ سوڈانی انقلاب سوڈانی عوام کو جبرسے آزاد کرنے اورعزت وقار کی بحالی کے لیے آیا ہے۔ انہوں نے سوڈانی انقلاب کو ممکن بنانے میں تعاون کرنے والے ممالک کا شکریہ ادا کیا۔
انہوں نے تصدیق کی کہ سوڈان بین الاقوامی قوانین کی پاسداری اور بین الاقوامی معاہدوں میں حصہ لینے کے لیے پرعزم ہے۔