بنگلورو،7/اکتوبر (ایس او نیوز /ایجنسی) جرنلزم دہشت گردی نہیں ہے اور نہ ہی جرنلسٹس دہشت گرد ہیں، تو پھر مودی و امت شاہ ان سے کیوں ڈر رہے ہیں؟ اس طرح کے نعروں کے ساتھ شہر بنگلورو کے فریڈم پارک میں کئی صحافی، اہم شخصیات و سماجی کارکنان نے بڑے پیمانے پر احتجاج کیا۔ اس احتجاج میں شرکاء نے کہا کہ مودی و امت شاہ 2024 کے انتخابات کی ہار سے بوکھلاہٹ کا شکار ہیں اور اسی لئے جرنلسٹس پر حملاور ہیں تاکہ ان میں خوف پھیلایا جائے

صحافیوں کی رہائش گاہوں پر دہلی پولیس کے چھاپوں پر تشویش کا اظہار کرتے ہوئے بنگلور وپریس کلب نے بدھ کو اس معاملے میں غیر جانبدارانہ اور تیز رفتار تحقیقات کا مطالبہ کیا اور اس بات پر زور دیا کہ پریس کی آزادی بہت ضروری ہے. بنگلورو پریس کلب نے اپنے بیان میں کہا کہ 'جمہوریت کے چوتھے ستون کے طور پر، پریس کی آزادی بہت ضروری ہے'، لیکن شہر میں منعقد کئے گئے اس احتجاج میں پریس کلب کے کسی بھی آفس بئیرر نے شرکت نہیں کی۔

واضح رہے کہ دہلی ہائی کورٹ نے جمعہ کے روز انسداد دہشت گردی قانون یو اے پی اے کے تحت درج ایک کیس میں نیوز کلک کے بانی پربیر پورکیاستھ اور ایچ آر ہیڈ امت چکرورتی کی گرفتاری کے خلاف عرضی پر سماعت کرنے سے اتفاق کیا ہے۔