بھٹکل:22/اگست(ایس او نیوز)معصوم ہاتھوں میں ملک کی خیرخواہی ، ترقی ، بہتری ، یک جہتی ، سالمیت اور بھائی چارگی کے پلے کارڈ کے ذریعے پیغام عام کرتے ہوئے جب قلب شہر شمس الدین سرکل سےبچے  قدم بڑھانے لگے تو ہر ہندوستانی خوش ہواہوگا کہ جب تک ایسے امن وانسانیت کا پیغام دینے والے موجود ہیں میرے ملک کو کچھ نہ ہوگا، واقعی میں میرا بھارت مہان ہے۔یہ وہ منظر ہے جب جماعت اسلامی ہند کی طرف سے ملک گیر سطح پر منائی جارہی ’’امن وانسانیت‘‘مہم کے تحت پیر کو شہر میں اسکولی بچوں کی امن ریلی نکالی گئی ۔ ریلی پرانےبس اسٹانڈ سے شروع ہوئی، گلف مارکیٹ ، سلطانیہ محلہ سے ہوتے ہوئے پبلک چبوترے پر اختتام کو پہنچی۔

ریلی کےاختتام پر بچوں نے اپنے ساتھ سبھی حضرات کو حلف دلواتے ہوئے وعدہ کیا کہ ہم ملک کے مستقبل کے  رہنماو قائد بچوں سے پیا رکرتے ہیں، ہم کسی سےنفر ت نہیں کریں گے ، ہم اس ملک کی ترقی کے لئے ہمیشہ تیار رہنے کا اعادہ کرتے ہوئے  بہتر انسان اور شہری ہوں گے،بچوں نے حلف میں کہاکہ ہم ہمارے والدین، بھائی ، بہن اور اساتذہ کا احترام و عزت کریں گے ، ہم اپنی زبان سے سچ اور محبت بھری باتیں ہی کہیں گے ، کسی کو تکلیف نہیں دیں گے ، درد نہیں دیں گے ، بے سہاروں اورلاچاروں کی مدد کریں گے اور ہمیشہ سماجی خدمت کو ترجیح دیں گے۔ ہم اپنے ملک کی تن من دھن سے خدمت کریں گے، ہم ہمارے گھر، خاندان ، دھرم اور دیش کا نا م روشن کریں گے۔ ریلی میں ضلع استقبالیہ کمیٹی کے کنونیر طلحہ سدی باپا ، تعلقہ کمیٹی کے کنونیر مجاہد مصطفیٰ، مہم کے کنونیر محمد یونس رکن الدین ، بھاسکر نائک، مولانا سید زبیر مارکیٹ، سید اشرف برماور، ایس کے صلاح الدین ، فاروق ماسٹر وغیرہ موجود تھے۔