بنگلورو، یکم جون(ایس او نیوز) شہر کے سٹی ریلوے اسٹیشن پر ایک فرضی دستی بم برآمد ہونے سے افراتفری مچ گئی اور اسٹیشن کی سکیورٹی کو کئی گنا بڑھادیا گیا۔ آج صبح 9/ بجے کے آس پاس اسٹیشن کے پلاٹ فارم نمبر 1 پر پٹنہ ایکسپریس کی ایک بوگی میں دیسی بم برآمد ہوا۔ جس کی وجہ سے اسٹیشن میں افراتفری مچ گئی، فوری طورپر بم اسکواڈ اور پو لیس فورس کو طلب کرکے تلاشی مہم شروع کردی گئی۔ تلاشی مکمل ہونے کے بعد سوائے فرضی بم کے پولیس کو کچھ ہاتھ نہیں لگا۔ اس واقعے کے بعد اسٹیشن پر سکیورٹی سخت کرنے کے ساتھ مسافروں کے ساز وسامان کی تلاشی بھی سخت کردی گئی۔ ریلوے کی آئی جی پی روپا، ایس پی بھیما شنکر گلید اور دیگر اعلیٰ عہدیداروں نے ریلوے اسٹیشن کا دورہ کیا اور ان بوگیوں کی بھی تلاشی لی جہاں پر یہ مشتبہ بم برآمد ہوا۔ بتایاجاتاہے کہ اس بم نما شئے کو جسے دیسی بم قرار دیا گیا ہے، جانچ کے لئے فورنسک لیاب روانہ کردیا گیا۔ ا س کے لئے پولیس نے اسٹیشن کے سی سی ٹی وی کیمروں کے مناظر کی تحقیق شروع کردی ہے تاکہ ان عناصر کا پتہ لگایا جاسکے جو پٹنہ ایکسپریس کی بوگی نمبر S1میں یہ مشتبہ بم چھوڑ کر فرار ہوگئے تھے۔ پٹنہ ایکسپریس میں بم برآمد ہونے کی اطلاع ملتے ہی اس ٹرین میں جانے کے منتظر مسافرخوفزدہ ہوگئے۔ پورے اسٹیشن میں اس افواہ سے افراتفری مچ گئی کہ مسافروں کو مارنے کے لئے ریل گاڑیوں میں بم رکھ دئے گئے ہیں۔ پولیس حکام نے فوری طور پر یہاں پہنچ کر مسافروں کو تیقن دیا کہ پٹنہ ایکسپریس میں جو بم برآمد ہوا ہے وہ ایک فرضی بم ہے۔ پولیس اس کی جانچ میں لگی ہوئی ہے، مشتبہ ملزموں کا پتہ لگانے کے لئے دس ٹیمیں تشکیل دی گئی ہیں۔ان میں بنگلور پولیس کی پانچ اور ریلوے پروٹیکشن فورس کی پانچ ٹیمیں شامل ہیں۔ ڈپٹی کمشنر آف پولیس روی چننا ور نے بتایا کہ ابتداء جانچ سے پتہ چلاہے کہ کہ بو گی میں جو بم نماشئے برآمد ہوئی ہے وہ بم سازی کے استعمال میں آتی ہے۔ اس واقعے بعد نہ صرف میجسٹک بلکہ یشونت پور، کنٹونمنٹ اور ایسٹ ریلوے اسٹیشنوں میں بھی تلاشی مہم سخت کردی گئی۔