نئی دہلی ،29؍دسمبر(ایس او نیوز؍ایجنسی ) چین اور دنیا کے کئی ممالک میں کووڈ وباء  کے تیزی سے پھیلنے کی اطلاعات کو لے کر ہندوستان پوری طرح سے الرٹ موڈ میں ہے ۔  دنیا کے الگ الگ ممالک سے آنے والے مسافروں کی ٹسٹنگ بھی تیز کردی گئی ہے -دوسالہ ماضی کے خوفناک واقعات کے پیش نظرمرکزی وزارت صحت نے خدشہ ظاہرکرتے ہوئے کہا ہے کہ ہندوستان میں جنوری کے وسط میں کورونا کیس بڑھ سکتے ہیں -

ماضی کے رجحانات کا تجزیہ کرنے کے بعد خیال کیا جا رہا ہے کہ اگلے 40دن ملک کیلئے مشکل ہوں گے- ذرائع کے مطابق ملک میں کورونا کی ایک اور لہر آسکتی ہے- ایسے میں تمام ریاستوں اور مرکز کے زیر انتظام علاقوں میں صحت کی سہولیات کا جائزہ لیا جا رہا ہے-درحقیقت یہ دیکھا گیا ہے کہ نئی لہر مشرقی ایشیا کو متاثر کرنے کے 30سے 35دن بعد ہی ہندوستان پہنچی ہے- یہ ایک رجحان رہا ہے، جس کی بنیاد پر یہ دعویٰ کیا جا رہا ہے-

ایسے میں بہار کے گیا میں دو غیر ملکی شہری کورونا سے متاثر پائے گئے ہیں - وہ بنکاک اور تائیوان کے رہائشی ہیں - گیا میں اب تک کل 19 افراد مثبت پائے گئے ہیں -دوسری جانب چہارشنبہ کو دبئی سے آنے والے دو مسافر چینائی  ایئرپورٹ پر کووڈ پازیٹیو پائے گئے ہیں - یہ دونوں تمل ناڈو کے پڈوکوٹائی کے النگوڈی ضلع کے رہنے والے ہیں - چہارشنبہ کو ہی ممبئی ہوائی اڈے پربھی  دو مسافر کورونا پازیٹیو پائے گئے- ان کے نمونے جینوم کی ترتیب کیلئے بھیجے گئے ہیں -اس کے ساتھ ہی گزشتہ 3دنوں میں 43بین الاقوامی مسافر مثبت پائے گئے ہیں - ان میں ایک خاتون اور اس کی 6سالہ بچی شامل ہے جو چین سے سری لنکا کے راستے تمل ناڈو آئی تھی-

24دسمبر سے 26دسمبر تک 498پروازوں کی اسکریننگ کی گئی- اس دوران 1780 نمونے لیے گئے- ان میں سے 39مثبت پائے گئے ہیں -کورونا کی تیاریوں کو جانچنے کیلئے منگل کو ملک کی تقریباً تمام ریاستوں میں موک ڈرل بھی کی گئی ہے۔