کورونا کی نئی قسم دریافت! برطانیہ میں ہاہاکار،پوری دنیا خوفزدہ،ایک درجن سے زائد ممالک نے کیں فضائی خدمات معطل
لندن،22؍دسمبر(ایس او نیوز؍ایجنسی) برطانیہ میں نئے کورونا وائرس سے ہاہاکار مچی ہوئی ہے - ہندوستان سمیت ایک درجن سے زائد ممالک نے برطانیہ کے ساتھ فضائی خدمات معطل کردی ہیں - لیکن اب تک کم سے کم 5 ممالک میں نیا کورونا وائرس پھیل چکا ہے- تاہم، بہت سے ممالک نے اس خدشے کا اظہار کیا ہے کہ یہاں کورونا وائرس کا ایک نیا معاملہ موجود ہوسکتا ہے-
ڈیلی میل کی رپورٹ کے مطابق، برطانیہ کے علاوہ ڈنمارک، نیدرلینڈ، آسٹریلیا اور اٹلی میں بھی نئے کورونا وائرس کی تصدیق ہوگئی ہے- برطانیہ سے ایک مسافر روم پہنچا، جس کی وجہ سے اٹلی میں نیا کورونا وائرس پایا گیا ہے- فرانس کو بھی اس نئے وائرس کے بارے میں خبردار کیا گیا ہے-کورونا وائرس کی نئی قسم کے انکشاف کے بعد کئی یورپی اور مشرقِ وسطیٰ کے ممالک نے اس پر سفری پابندیاں عائد کر دی ہیں -اتوار کو کئی یورپی ممالک بشمول فرانس، اٹلی، بلجیم، نیدرلینڈ نے برطانیہ میں کورونا وائرس کی ایک اور نئی شکل اور اس کے تیزی سے پھیلنے کے شواہد ملنے پر سفری پابندیاں عائد کر دیں - اس کے بعد سعودی عرب، اسرائیل، کینیڈا اور کویت نے بھی اسی نوعیت کی پابندیاں عائد کر دی ہیں -
عالمی ادارہئ صحت (ڈبلیو ایچ او) کا کہنا ہے کہ برطانیہ کے علاوہ وائرس کی اس نئی قسم کے نو کیس ڈنمارک جب کہ ایک، ایک نیدر لینڈ اور آسٹریلیا میں رپورٹ ہوئے ہیں - برطانوی وزیرِ اعظم بورس جانسن کا کہنا ہے کہ وائرس کی نئی قسم کے 70 فیصد زیادہ تیزی سے ایک انسان سے دوسرے انسان میں منتقل ہونے کے شواہد ملے ہیں -ان کا کہنا تھا کہ وہ حتمی طور پر کچھ نہیں کہہ سکتے کہ ویکسین اس وائرس کی اس نئی قسم کے خلاف بھی مؤثر ہو گی یا نہیں - تاہم سائنس دان اس کے ممکنہ اثرات کا جائزہ لے رہے ہیں -