NEET امتحان میں دھاندلی کے ریکیٹ کا پردہ فاش، سی بی آئی نے ماسٹر مائنڈ سمیت آٹھ لوگوں کو کیاگرفتار
نئی دہلی،21؍ جولائی (ایس او نیوز؍ایجنسی) سی بی آئی نے میڈیکل کالج (ایم بی بی ایس )میں داخلے کے لئے درکار NEET امتحان میں گڑبڑی کرنے والے ریکیٹ کا پردہ فاش کیا ہے ۔ ذرائع سے ملی اطلاع کے مطابق یہ ریکیٹ ملک کے ٹاپ میڈیکل کالجوں میں داخلے کے لیے ضروری نیٹ امتحانات میں کامیابی کے لئے طلبہ سے 20 / 20 لاکھ روپئے وصول کئے تھے اور اصلی طلبہ کے بجائے جعلی کو امتحان گاہ میں بھیج کر پرچے لکھوارہے تھے۔ اس ضمن میں سی بی آئی نے ماسٹر مائنڈ سمیت آٹھ ملزمین کو گرفتار کرنے کا دعویٰ کیا ہے۔
میڈیا میں آئی رپورٹوں کے مطابق بہار، اتر پردیش، مہاراشٹرا اور ہریانہ میں پھیلی دھوکہ دہی کی کارروائی سے پتہ چلا ہے کہ یہاں بالی ووڈ کی معروف ہندی فلم "منا بھائی ایم بی بی ایس" کے طرز پر کام کیا گیا ہے۔ان ریاستوں میں امتحانی پرچے حل کرنے والوں نے طلبہ سے بھاری رقم لی ہے اور اس کے بدلے میں جوابی پرچے لکھوا ئے گئے ہیں۔
سی بی آئی ذرائع کے حوالے سے بتایا گیا ہے کہ میڈیکل کی ہر سیٹ کے لئے 20 لاکھ روپے لئے جارہے تھے۔ اس میں سے 5 لاکھ روپے اس شخص کو دیئے گئے جس نے امتحانی پرچہ لکھا۔ بقیہ رقم مڈل مین اور دوسرے لوگ بانٹ لیتے تھے۔
سخت حفاظتی انتظامات کے بعد بھی دھاندلی: د ھوکہ دہی کو روکنے کے لیے، حکام نے NEET کے لیے حفاظتی بندوبست سخت کر دیاتھا، اور امتحان گاہ میں پرس، ہینڈ بیگ، بیلٹ، ٹوپی، زیورات، جوتے اور اونچی ایڑی والے جوتے ممنوع قرار دئیے گئے تھے۔ امیدواروں کو اسٹیشنری لے جانے کی بھی اجازت نہیں تھی۔ لیکن اس ریکٹ نے اصلی کی جگہ جعلی طلبہ کو ہی امتحان گاہ روانہ کرنے کا منصوبہ بنایا تھا۔
ریکٹ نے طلبہ کی تصویروں کے ساتھ چھیڑ چھاڑ کرکے اور NEET شناختی کارڈ میں ہیرا پھیری کی پھر اصلی کی جگہ نقلی طلبہ کو امتحان گاہ میں داخل کرانے میں کامیاب ہوگیا جو باآسانی پرچہ لکھ کر باہر نکلنے میں کامیاب ہوا۔ ذرائع کے مطابق اس کام کے لئے ملزمان نے امیدواروں کا یوزر آئی ڈی اور پاس ورڈ بھی حاصل کیا تھا۔
کیسے پتہ لگا ؟ : میڈیا رپورٹوں کے مطابق سی بی آئی کو نیشنل ٹیسٹنگ ایجنسی (این ٹی اے) کے ذریعے اتوار کو منعقدہ نیٹ امتحان میں دہلی اور ہریانہ کے کئی مراکز میں حقیقی امیدواروں کی جگہ پر جعلی اُمیدواروں کو امتحان میں بٹھانے کی سازش کئے جانے کی اطلاع موصول ہوئی جس کے بعد سی بی آئی حرکت میں آگئی اور آٹھ لوگوں کو گرفتار کرلیا گیا۔