بوڈاپیسٹ ، 29/اگست (ایس او نیوز/ایجنسی)ورلڈ ایتھلیٹکس چیمپئن شپ کے جیولن تھرو مقابلے میں ہندوستان کے تجربہ کاراتھلیٹ نیرج چوپڑا نے گولڈ میڈل جیت کر تاریخ رقم کردی ہے۔ اس کے ساتھ ہی پاکستانی کھلاڑی کو چاندی کے تمغے پر مطمئن ہونا پڑا ہے۔  اس طرح نیرج چوپڑا عالمی ایتھلیٹکس چیمپئن شپ میں گولڈ میڈل جیتنے والے پہلے ہندوستانی بن گئے ہیں۔

نیرج چوپڑا کے لیے شروعات اچھی نہیں رہی تھی۔ وہ پہلی کوشش کے بعد 12 ویں نمبر پر تھے۔ ان کے تھرو کو غلط قرار دیا گیا تھا۔ لیکن اس کے بعد نیرج چوپڑا نے شاندار واپسی کی اور دوسرے راؤنڈ کے بعد 88.17 میٹر کے ساتھ ٹاپ پر پہنچ گئے۔ اس کے ساتھ ہی جرمنی کے جولین ویبر دوسرے راؤنڈ میں 85.79 میٹر پھینک کر دوسرے نمبر پر آئے۔ جبکہ اس راؤنڈ کے بعد جمہوریہ چیک کے جیکوب واڈلیچ 84.18 میٹر کے اسکور کے ساتھ تیسرے نمبر پر رہے۔

ہندوستانی تجربہ کار نے تیسرے راؤنڈ میں 86.32 میٹر کا فاصلہ طے کیا۔ ساتھ ہی اس راؤنڈ کے بعد پاکستان کے ارشد ندیم 87.82 کے اسکور کے ساتھ دوسرے نمبر پر آگئے۔ پاکستان کے ارشد ندیم کو دوسرا مقام  ملا۔ اس سے پہلے نیرج چوپڑا اولمپکس کے علاوہ ڈائمنڈ لیگ میں گولڈ میڈل جیت چکے ہیں۔ اس کے ساتھ ہی اب نیرج چوپڑا نے عالمی ایتھلیٹکس چیمپئن شپ میں گولڈ میڈل جیت کر ایک بڑا ریکارڈ بنا لیا ہے۔

4x400 میٹرریلے مقابلے میں ہندوستانی کھلاڑیوں نے مایوس کیا۔ ہندوستان 4x400 میٹر ریلے ریس میں پانچویں نمبر پررہا۔ اس زمرے میں امریکہ نے طلائی تمغہ جیتا۔ جبکہ فرانس نے چاندی کا تمغہ جیتا۔ جبکہ برطانیہ کانسے کے تمغہ کے ساتھ تیسرے نمبر پر رہا۔