سیدھی،17؍ فروری (ایس او نیوز؍یواین آئی) مدھیہ پردیش کے ضلع سیدھی کے رام پور نیکن تھانہ علاقے میں آج صبح بانساگر ڈیم پروجیکٹ سے منسلک نہر میں بس کے گرنے سے 47مسافروں کی موت ہوگئی اور سات دیگرکو بحفاظت بچالیا گیا۔اس بس میں سوار 7؍مسافروں کو راحت رساں عملے نے بچالیا۔مرنے والوں میں 21 مرد، 18 خواتین اور ایک بچہ شامل ہے۔ سات شخص شروعات میں ہی کسی طرح نہر سے تیر کر نکل آئے اور ان کی مقامی دیہی باشندوں نے مدد کی۔ دوپہر بعد بھی نہر میں کچھ مسافروں کے بہنے کے خدشہ کے سبب تلاشی مہم جاری ہے۔ حادثہ کی مجسٹریل انکوائری کا حکم دیا گیا ہے۔بس میں گنجائش سے زیادہ مسافرسوارتھے۔ بس کی صلاحیت 32 مسافروں کی تھی اور اس میں تقریباً 60 مسافرسوارتھے۔ بس ڈرائیورکے بارے میں بتایا گیا ہے کہ وہ بحفاظت بچ گیا ہے۔ حالانکہ اس کا نام ابھی تک سامنے نہیں آپایا ہے۔

سرکاری ذرائع کے مطابق جائے حادثہ سیدھی ضلع ہیڈکوارٹرسے تقریباً 80 کلومیٹر دور سرداگاؤں میں ہے۔ یہاں سے ستنا ضلع ہیڈکوارٹر تقریباً سوکلومیٹر دور ہے۔ بس صبح تقریباً چھ بجے سیدھی سے ستنا کے لئے روانہ ہوئی تھی اور متعینہ روڈ کے وادی چھوہیا میں جام کے سبب بس ڈرائیور نے راستہ بدل لیا اورپردھان منتری گرام سڑک یوجنا کے تحت تعمیر نہر کے متوازی چل رہی سڑک پر آنے کے بعد یہ حادثہ ہوگیا اور تقریباًساڑھے سات بجے بس نہر میں غائب ہوگئی۔ ذرائع نے بتایا کہ بان ساگر ڈیم آبی ذخائر سے جڑی اس نہر میں 20 فٹ سے زیادہ پانی جمع تھا۔