دہلی کانگریس کے صدر اروندر سنگھ لولی مستعفی
نئی دہلی، 29/اپریل (ایس او نیوز /ایجنسی) دہلی کانگریس کے ریاستی صدر اروندر سنگھ لولی نے اچانک اپنے عہدہ سے استعفیٰ دے دیا ہے۔ اروند ر سنگھ لولی نے کانگریس کے قومی صدر ملکارجن کھرگے کو چار صفحات پر مشتمل خط ارسال کرکے اپنے استعفیٰ کا اعلان کیا اور ان کے سامنے استعفیٰ کی کئی وجوہات پیش کیں۔ انہوں نے اپنے ارسال کردہ خط میں ’انڈیا اتحاد‘ کے تحت عام آدمی پارٹی کے ساتھ اتحاد کو اہم وجہ قرار دیا۔ اس کے علاوہ ریاستی انچارج دیپک بابریا کے ساتھ تال میل نہ ہونا سمیت دیگر وجوہات کا تفصیل سے ذکر کیا ہے۔
یاد رہے کہ اروندر سنگھ لولی اس سے پہلے بھی ایک بار کانگریس سے استعفیٰ دے کر بی جےپی میں شامل ہو چکے ہیں۔ بی جےپی میں رہتے ہوئے انہوں نے کچھ قابل اعتراض بیانات دئے تھےجس کے سبب کانگریس حامیوں میں ناراضگی پیدا ہو گئی تھی مگر انھیں دوبارہ کانگریس میں شامل کر لیا گیا۔ اب انہوں نے ’انڈیا اتحاد‘پر سوال اٹھایا ہے۔ ان کا کہنا ہے کہ دہلی میں کانگریس جس پارٹی کے خلاف تھی، لوک سبھا انتخابات میں اسی پارٹی سے ہاتھ ملا لیا ہے۔ لولی نے کہاکہ جنرل سکریٹری کی ہدایت پرمیں اروند کیجریوال کی گرفتاری کی رات سبھاش چوپڑااور سندیپ دیکشت کے ساتھ ان کی رہائش گاہ پر بھی گیا تھا، اس کے باوجود اروند کیجریوال میرے موقف خلاف تھے۔