بیلگاوی 12 / دسمبر(ایس او نیوز) بیلگاوی کے ونتاموری گاوں میں ایک لڑکا مقامی لڑکی کے ساتھ فرار ہوگیا تو اُس کی ماں کو نشانہ بنانے اور اسے برہنہ کرکے پریڈ کروانے کی شرمناک واردات منظر عام پر آنے کے بعد پولس نے سات لوگوں کو گرفتار کرلیا ہے جس میں چار خواتین بھی شامل ہیں۔

پتہ چلا ہے کہ  لڑکے کی ماں کو نہ صرف برہنہ کرکے کھمبے سے باندھ کر پیٹا گیا بلکہ اسے برہنہ حالت میں ہی پریڈ بھی کروایا گیا ۔

یہ واقعہ ریاستی حکومت کے لئے اس لئے بھی شرمندگی اور ہزیمت کا باعث بن گیا ہے کیونکہ بیلگاوی میں واقع سوورنا ودھان سودھا کے بالکل قریبی علاقے میں ہی پیش آیا ہے جہاں اس وقت اسمبلی کا سرمائی اجلاس بھی جاری ہے ۔

پولیس کے بیان کے مطابق  دونڈپّا نائیک اور پریانکا نامی لڑکا اور لڑکی گھر سے فرار ہونے کےپس منظر میں  آدھی رات کو  یہ واردات پیش آئی ہے ۔ پریانکا کے گھر والے اسے اپنے عاشق دونڈپّا سے الگ کرکے اس کی شادی دوسری جگہ کروانا چاہتے تھے ، اس لئے وہ ڈونڈپّا کے ساتھ گھر سے فرار ہوگئی۔ اس کی وجہ سے  مشتعل ہو کر پریانکا کے گھر والوں نے ڈونڈپّا کے گھر میں گھس کر توڑ پھوڑ مچائی ۔ ڈونڈپّا کی ماں کملمّا کو گھر سے باہر گھسیٹا اور اسے الیکٹرک کھمبے سے باندھ کر مارنے پیٹنے سے قبل اسے برہنہ کرکے گاوں میں پریڈ کروایا ۔

اس غیر انسانی سلوک اور واردات کی خبر ملنے پر ریاستی وزیر داخلہ ڈاکٹر پرمیشور نے اسپتال پہنچ کر متاثرہ خاتون کی خبر گیری کی اور تمام تفصیلات حاصل کرتے ہوئے ونتاموری گاوں کا دورہ بھی کیا ۔ پڑوسیوں نے جب اس معاملے پر کچھ بولنے میں جھجک ظاہر کی تو وزیر موصوف نے ان سے کہا کہ وہ بے جھجک بولیں اور پورا تعاون کریں کیونکہ متاثرہ خاتون انہیں میں سے ایک ہے ۔ 

ڈاکٹر پرمیشور نے بتایا کہ واردات کی اطلاع ملنے پر پولیس نے موقع پر پہنچ کر خاتون کو بچا لیا ۔ اس ضمن میں 7 افراد کو گرفتار کیا گیا ہے ۔ انہوں نے واقعے کو بدبختانہ قرار دیا اور کہا کہ اس کے خلاف کٹھن قانونی کارروائی کی جائے گی ۔