واشنگٹن،12؍اپریل (ایس او نیوز؍ایجنسی) پوری دنیا میں کورونا متاثرین کی تعداد جہاں 18 لاکھ کی جانب گامزن ہے وہیں اس سے ہلاک ہونے والوں کی تعداد ایک لاکھ 8 ہزار سے زیادہ ہو گئی ہے اور اب امریکہ وہ ملک ہوگیا ہے جہاں اس وائرس سے مرنے والوں کی تعداد سب سے زیادہ ہے۔

امریکہ میں کورونا وائرس سے ہلاک ہونے والوں کی تعداد 20 ہزار سے اوپر پہنچ گئی ہے اور متاثرین کی تعداد پانچ لاکھ سے اوپر ہے۔ امریکہ کے بعد اٹلی دنیا کاوہ ملک ہے جہاں ہلاکتوں کی تعداد سب سے زیادہ ہے اور وہاں اموات کی تعداد 19ہزار سے اوپر ہےجبکہ متاثرین کی تعداد ایک لاکھ52 ہزار ہے۔یوروپ کے ملک اسپین میں کورونا متاثرین کی تعداد ابھی بھی یوروپ میں سب سے زیادہ ہے اور وہاں متاثرین کی تعداد ایک لاکھ 63 ہزار ہے اور اس سے ہلاک ہونے والوں کی تعداد 16 ہزار سے زیادہ ہے۔جرمنی میں کورونا متاثرین کی تعداد ایک لاکھ 25 ہزار سے زیادہ ہے اور مرنے والوں کی تعداد 2800 کے اوپر ہے۔

فرانس میں اس وائرس سے ہلاک ہونے والوں کی تعداد 14 ہزار کے قریب پہنچ گئی ہے اور برطانیہ میں اموات کی تعداد 10 ہزار کے قریب پہنچ گئی ہے اور وہاں متاثرین کی تعداد 78 ہزار سے زیادہ ہوگئی ہے۔

ایران میں متاثرین کی تعداد 74 ہزار سے زیادہ ہے اور وہاں اس وبا سے ہلاک ہونے والوں کی تعداد 4300 سے اوپر ہے۔پاکستان میں کورونا متاثرین کی تعداد پانچ ہزار سے تجاوز کرگئی ہے اور وہاں اموات کی تعداد 86 ہے۔ ہندستان میں اضافہ کارجحان جاری ہے اور اب تک 242 اموات رپورٹ ہو چکی ہیں ۔