مینگلور 11 / جنوری (ایس او نیوز) مینگلور کے قریب بنٹوال میں پیش آئی ڈکیتی کی واردات میں  نقا ب پوش لٹیروں نے زبردستی  ایک گھر میں گھس کر چاقو کی نوک پر نقدی سمیت لاکھوں روپے مالیت کے زیورات   لوٹ کر فرار ہوگئے ہیں۔ واردات جمعرات صبح بنٹوال کے  ارچیکٹے میں ٹری پارک کے قریب پیش آئی۔

اطلاع  کے مطابق  فلورین پنٹو کے نئے گھر  میں صبح قریب 6:30  بجے  نقاب پوش لٹیروں نے پہلے گھر کی گھنٹی بجائی اور دروازہ کھلنے پر زبردستی اندر داخل ہونے کے ساتھ فلورین پنٹو اور اس کی بیٹی مرینا پنٹو کو چاقو کی نوک پر  دھمکاتے ہوئے الماریوں کی چابی حاصل کی ۔ اس کے بعد الماری میں موجود تقریبا 2.90 لاکھ روپے مالیت کے مختلف قسم کے زیورات اور 30 ہزار روپے نقد اور ایک موبائل فون لوٹ کر فرار ہوگئے ۔ فلورینا کی بیٹی مرینا نے لٹیروں کے ساتھ مزاحمت کی پوری کوشش کی مگر وہ اس میں کامیاب نہیں  ہوسکی  اور اس دوران اس کا  ہاتھ زخمی ہوگیا ۔

    ڈکیتی کی خبر ملنے پر ضلع سپرنٹنڈنٹ آف پولیس سی بی ریشیانتھ ، دیہی پولیس انسپکٹر شیوا کمار، ایس آئی ہریش وغیرہ نے جائے واردات پر پہنچ کر معائنہ کیا ۔ فنگر پرنٹ ماہرین اور ڈاگ اسکواڈ کی مدد سے تفتیش جاری ہے ۔