بھٹکل:14؍جنوری (ایس او نیوز)انسانی زندگی بہت ہی اہم ہوتی ہے اس کو آفاقی پیغام و رہنمائی اور پیغمبروں کی تعلیمات کے مطابق گزارنا چاہئے۔  منگلورو سے شائع ہونے والے کنڑا نسوانی ماہنامہ ’انوپما‘ کی معاون مدیرہ محترمہ  صبیحہ فاطمہ نے ان خیالات کااظہار کیا۔

وہ یہاں بھٹکل جماعت اسلامی ہند کے شعبہ خواتین کی جانب سے الکوثر گرلس کالج میں منعقدہ تعلقہ سطح کی سیرت کوئز اور مضمون نویسی مقابلے کے انعامی تقریب کی صدارت کرتے ہوئے خطاب کررہی تھیں۔ انسانی زندگی کے لئے ضروری تعلیمات و رہنمائی پر روشنی ڈالتے ہوئے موصوفہ نے کہاکہ آخری نبی حضرت محمد ﷺ کی زندگی کا اہم مقصد بے انصافی، جبروظلم ، استحصال سےپاک زندگی تھی۔ نبی ﷺ سادگی کے ساتھ زندگی گزارتے ہوئے پورے عالم کے لئے بہترین نمونہ بنے، وہ نسوانی حقوق کے پاسدار تھے، عورتوں ، بوڑھوں اور بچوں کے عزت و احترام کا درس دینے والے رہبر ہیں۔ حضرت محمد ﷺ فرقہ واریت کے خلاف اعلان جنگ کرتے ہوئے فرقہ واریت میں تعاون کرنےو الوں کا   اسلام سے کوئی تعلق نہیں ہونے کی بات کہی۔ اللہ کے نبی ﷺ نے  کہاکہ اپنے طبقہ کا فرد برے کام کرنے پر بھی اس کی حمایت کرنےو الاہی فرقہ پرست ہے ۔ اللہ کے نبی ﷺ اسلام کے بانی نہیں بلکہ آخری پیغمبر ہیں۔ بھارتیوں میں آپسی بھائی چارگی ، محبت ، مساوات، یک جہتی کو فروغ دینے کے لئے  ایسے پروگرام منعقد کرنے پر منتظمین کی ستائش کی۔

بھٹکل سرکاری اسپتال کی میڈیکل آفیسر ڈاکٹر سویتا کامت نے مہمان خصوصی کی حیثیت سے اپنے خیالات کااظہار کرتے ہوئے کہاکہ پچھلے کئی دہوں سے بھٹکل میں ہندومسلمان  بھائی چارگی سے رہنے کے متعلق کئی مثالیں پیش کیں  اوراس طرح کے آپسی میل جول کےپروگراموں کے  ذریعےمن و شانتی کو قائم کرنے میں معاون ہونے کی بات کہی۔ بھٹکل زون وسائل آفیسر شریمتی یلما مری سوامی نے  تمام مذاہب انسانیت  کا درس دیتے ہیں ہم سب انسان ہیں آپس میں پیار ومحبت سے رہنے کی  بات کہی۔

’حضرت محمد ﷺ انسانیت کے عظیم رہنما ‘ کے عنوان پر منعقدہ تعلقہ سطح کے مضمون نویسی مقابلے میں 70سے زائد خواتین سے حصہ لیا۔ نیو انگلش پی یو کالج  بھٹکل کی لکچرر نوتنا و بھوجلے اول، نیشنل پی یو کالج مرڈیشور کی جیوتی ہیبار دوم اور مرڈیشور اقراء ہائی اسکول  مرڈیشورکی نوویلا آسس لوئس سوم انعام کی حقدار بنیں۔

طالبات کے لئے منعقدہ ’سیرت کوئز ‘ مقابلے میں نیو انگلش پی یو کالج بھٹکل کی طالبہ جئے شری کرشنا پربھو اول، اقراء ہائی اسکول کی سویتا کے ٹی دوم اور نیشنل کالج مرڈیشور کی ناگرتنا ایم نائک اور نیوانگلش پی یوکالج بھٹکل کی کوسوما سریش نایک مشترکہ طورپر سوم انعام حاصل کیا۔ ان کے علاوہ سرکاری پرائمری اسکول ہریجن کیری مرڈیشور کی ہرشیتا نایک اور ونیتا دیواڑیگا کو تشجیعی انعامات سے نوازاگیا۔ محترمہ صبیحہ کوڑا نے استقبال کرتے ہوئے افتتاحی کلمات پیش کیں تو محترمہ نبیرہ محتشم نے شکریہ اداکیا اور محترمہ ندیم استانی نے نظامت کے فرائض انجام دئیے۔ ڈائس پر جماعت اسلامی ہند بھٹکل کے شعبہ خواتین کی ناظمہ محترمہ فوزیہ شکیل، ودیابھارتی ہائی اسکول کی صدر مدرسہ روپا کھاروی ، اقراء ہائی اسکول کی صدرمدرسہ شاہین سلطانہ موجود تھیں۔