منگلورو پولیس نے ڈی وائی ایف آئی کو دیا ٹیپو سلطان کا کٹ آوٹ ہٹانے کا نوٹس
منگلورو 21 / فروری (ایس او نیوز) منگلورو میں کوناجے پولیس نے ڈیموکریٹک یوتھ فیڈریشن آف انڈیا (ڈی وائی ایف آئی) کی طرف سے لگایا گیا 6 فٹ لمبا ٹیپو سلطان کا کٹ آوٹ ہٹانے کے لئے نوٹس جاری کیا ہے۔
خیال رہے کہ کارڈ بورڈ سے بنا ٹیپو کا یہ کٹ آوٹ الال تعلقہ کے ہاریکلا میں جمعہ اور سنیچر کی درمیانی رات میں لگایا تھا ۔ پولیس کی طرف سے دئے گئے نوٹس میں کہا گیا ہے کہ امن و امان کو برقرار رکھنے کے لئے اس کٹ آوٹ کو ہٹانے کی ہدایت دی جا رہی ہے جسے لگانے کے لئے اجازت بھی نہیں لی گئی ہے۔
پولیس کی اس ہدایت پر رد عمل میں ڈی وائی ایف آئی کے دکشن کنڑا صدر امتیاز نے بیان جاری کیا ہے کہ 25 فروری کو کلاپو میں ڈی وائی ایف آئی کی جو 12 ویں سہ روزہ ریاستی کانفرنس ہونے والی ہے ، اس حوالے سے یہ کٹ آوٹ لگایا گیا ہے۔
معلوم ہوا ہے کہ ڈی وائی ایف آئی نے مختلف علاقوں میں رانی ابّکّا، کوٹی - چینّیّا اور بشمول مجاہدین آزادی دیگر نامور شخصیات کے کٹ آوٹس اور بینرس لگائے ہیں ۔ اس پس منظر میں امتیاز نے کہا :" اس لئے ٹیپو سلطان کا کٹ آوٹ ہٹانے کا سوال ہی پیدا نہیں ہوتا ۔" انہوں نے پوچھا کہ "عوامی مقامات پر ٹیپو سلطان کے کٹ آوٹس ، بینرس، مجسمے وغیرہ لگانے پر حکومت نے کب پابندی لگائی ہے ؟ دکشن کنڑا میں بی جے پی کی حکومت ہے یا کانگریس کی حکومت ہے ؟"