مینگلورو 28 / فروری (ایس او نیوز) ہلے انگڈی کوپلا ڈیم کے علاقے میں پیش آئے ایک المناک واقعے میں ایس ایس ایل سی میں زیر تعلیم چار طلبہ ندی میں غرقابی کی وجہ سے ہلاک ہوگئے ۔ مہلوک طلبہ کی شناخت یشویت (15 سال)، نیروپا (15 سال)،راگھویندرا (15 سال) اور انویت (15 سال) کے طور پر کی گئی ہے ۔ یہ چاروں لڑکے ودیا دائنی اسکول میں زیر تعلیم تھے ۔
بتایا جاتا ہے کہ جب پیشگی تیاری کے امتحان (پریپیریٹری) امتحان کا وقت ختم ہونے کے بعد یہ لڑکے اپنے گھر نہیں پہنچے تو ان کے اہل خانہ نے سورتکل پولیس اسٹیشن میں بچوں کی گم شدگی کی رپورٹ درج کروائی ۔ پھر جب پولیس نے کارروائی شروع کی تو سی سی ٹی وی فوٹیج سے پتہ چلا کہ یہ لڑکے ہلے انگڈی جانے والی بس پر سوار ہوئے ہیں ۔ ان میں سے ایک طالب علم کے پاس موجود موبائل فون کی وجہ سے پولیس کو ان کا لوکیشن معلوم کرنے میں آسانی ہوئی اور اسی کی بنیاد پر جب تلاشی ٹیم متعلقہ مقام پر پہنچی تو ان طلبہ کے یونیفارم، اسکول بیگس، جوتے وغیرہ ندی کے کنارے پڑے ہوئے ملے ۔ اس کے بعد مقامی لوگوں کے تعاون سے ان لڑکوں کی لاشیں ریلوے برڈج کے پاس ہلے انگڈی کوپلا ڈیم سے برآمد کی گئیں ۔
چاروں بچوں کی نعشوں کو مینگلور وینلاک سرکاری اسپتال منتقل کیا گیا ہے، جہاں پوسٹ مارٹم کے بعد لواحقین کے حوالے کی جائے گی۔