منگلورو،20؍نومبر (ایس او نیوز) شہر میں پاکی صفائی کو یقینی بنانے اور گندگی پھیلانے والوں کے  خلاف کڑی کارروائی کرنے کے مقصد سے منگلورو سٹی کارپوریشن (ایم سی سی) نے  مختلف مقامات پر سی سی ٹی وی  کیمرے لگانے کا فیصلہ کیا  ہے۔

معلوم ہوا ہے کہ ایم سی سی نے شہریوں کو کچرا الگ الگ کرنے اور سڑکوں کے کنارے عمارتوں کا ملبہ اور کچرا پھینکنے کے تعلق سے سخت ہدایات جاری کردی ہیں۔منگلور و سٹی کارپوریشن کے کمشنر نے ہیلتھ اینڈ سیانٹیشن ڈپارٹمنٹ کو ہدایت دی ہے کہ جن علاقوں میں  سڑکو ں پر کچرا پھینکا جاتا ہےا ور گندگی پھیلی ہوتی ہے ایسی جگہوں کی نشاندہی کرکے وہاں پر سی سی ٹی وی کیمرے لگائے جائیں اس  بات کا بھی پتہ چلا ہے کہ مذکورہ ڈپارٹمنٹ کے افسران نے شہر کے 60وارڈس میں 169ایسے مقامات کی نشاندہی کرلی ہے۔

ایم سی سی کے مطابق ابتدائی طور پر چند اہم مقامات پر کیمرے لگائے جائیں گے اور وہاں پر کچرا پھینکنے والوں کے خلاف کارروائی کرتے ہوئے بھاری جرمانہ لگایا جائے گا۔ سٹی کارپوریشن کے کمشنر اکشے سریدھر نے بتایا کہ :’’ ہم نے شہر میں بلیک اسپاٹس کی نشاندہی کرلی ہے۔شروعات میں  ہم دیکھیں گے کہ  چند مقامات پر کیمرے لگانے کا یہ منصوبہ کتنا کار آمد ہوتا ہے۔ اگر واقعی یہ ’پائلٹ لوکیشنس ‘بہتر اور کارگر ثابت ہوتا ہے تو پھر مزید دوسرے علاقوں تک بھی اس منصوبےکا دائرہ بڑھا دیا جائے گا۔‘‘