منگلورو: بی کے ہری پرساد نے کہا : "مہاتما گاندھی کو قتل کرنے والا ملک کا پہلا دہشت گرد گوڈسے ہے "
منگلورو 30 / فروری (ایس او نیوز) منگلورو میں منعقدہ سمپوزیم سے خطاب سے کرتے ہوئے ایم ایل سی ہری پرساد نے کہا کہ اس وقت دیش میں دائیں بازو کی تشدد پسند طاقتوں نے جس طرح خوف اور بھید بھاو کا ماحول پیدا کیا ہے اس سے نپٹنے کے لئے مہاتما گاندھی کا راستہ ہی واحد منتر ہے ۔
ڈی وائی ایف آئی کے 12 ویں سالانہ ریاستی اجلاس کے موقع پر 'گاندھی کا ساحلی دورہ - پیغام - چیلینجس' کے عنوان سے منعقدہ سمپوزیم کا افتتاح کرتے ہوئے بی کے ہری پرساد نے کہا کہ مہاتما گاندھی کے خیالات اور فکر ہمیشہ قابل تقلید ہے۔ انہوں نے کہا کہ پورے بھارت میں 230 افراد نے رامائن تصنیف کی ہے ۔ والمیکی اور تلسی داس سے کوئمپو کی 'رامائن درشنم' تک رامائن کے نام سے کئی کتابیں تصنیف ہو چکی ہیں۔ ہمیں معلوم نہیں کہ کس رامائن پر بھروسہ کرنا چاہیے۔
حقیقت یہ ہے کہ گاندھی جی نے رام راجیہ کا خواب دیکھا تھا اور اس کا تصور پیش کیا تھا۔ گاندھی کا ماننا تھا کہ 7 بڑے مذاہب، ساڑھے چار ہزار ذاتیں اور 19 ہزار زبانیں بولنے والوں کے بھارت دیش کو آگے بڑھانے تمام مذاہب کے ساتھ یکساں رویہ اختیار کرنا ضروری ہے۔
ہری پرساد نے کہا کہ دیش میں کچھ ایسی طاقتیں ہیں جو دیش بھکتی کے نام پر دیش سے غداری کا کام کر رہی ہیں ۔ اس تعلق سے ہمیں ہوشیار رہنا چاہیے ۔ انہوں نے دائیں بازو کی طاقتوں ( سنگھ پریوار) پر نشانہ سادھتے ہوئے کہا کہ مہاتما گاندھی سے بڑا ہندو کوئی اور نہیں ہو سکتا اور گاندھی کو قتل کرنے والا ملک کا پہلا دہشت گرد (نتھو رام) گوڈسے ہے ۔ میں نے یہ بات اس سے قبل پارلیمنٹ میں کہی تھی ۔ اب پھر ایک بار اسے دہراتا ہوں ۔ ایک بھی گولی چلائے بغیر پرامن طریقے سے ملک کو آزادی دلانے کا راستہ دکھانے والی شخصیت مہاتما گاندھی ہے ۔ دنیا کے 170 ممالک میں ان کا جنم دن منایا جاتا ہے۔ ایسی عظیم شخصیت کو بدمعاش کے طور پر پیش کرنے کی کوشش دائیں بازو کی شدت پسند طاقتیں کر رہی ہیں۔