منگلورو3؍اکتوبر (ایس او نیوز) جنوبی کینرا ضلع پنچایت دفتر کے ایک آفیسر کو اینٹی کرپشن بیورو کے افسران نے اس وقت رنگے ہاتھوں گرفتار کرلیا جب وہ ایک ایجنسی کو سرکاری سبسیڈی کی رقم جاری کرنے کے لئے 30ہزار روپے رشوت وصول کررہا تھا۔

موصولہ رپورٹ کے مطابق گرفتار شخص کا نام این ناگیش ہے، جوکہ مرکزی حکومت کی دیہی ایندھن اسکیم (نٹی گریٹیڈ رورل اینرجی پروگرام ) کا پروجیکٹ آفیسر ہے۔ٹارن کی ایجنسی نامی کمپنی کو بایو گیس کے لئے سرکاری سبسیڈی ملنی تھی۔ اس رقم کو جاری کرنے کے لئے ناگیش نے 50ہزار روپے کی رقم طلب کی تھی۔ ایجنسی سے متعلق ایک شخص نے 15ہزار روپے پہلی قسط ادا کرنے کے بعد اے سی بی پولیس کو اس کی اطلاع کردی کہ ناگیش مزید 35ہزار روپے کی مانگ کررہا ہے۔

شکایت ملنے پر اے سی بی پولیس سپرنٹنڈنٹ شرتی این ایس اور ڈی وائی ایس پی سدھیر ہیگڈے کی قیادت میں جال بچھاکر 30ہزار روپے نقد رقم رشوت لیتے ہوئے ناگیش کواس کے اپنے دفتر میں گرفتار کرلیا گیا۔