منگلورو : دل کا دورہ پڑنے سے 17 سالہ طالب علم کی موت
منگلورو،10/ جنوری (ایس او نیوز) سورتکل کے کرشنا پور میں ایک المناک واقعہ پیش آیا جس میں اسکول جانے کی تیاری کر رہا 17 سالہ طالب علم دل کا دورہ پڑنے سے فوت ہوگیا۔
ذرائع سے ملی اطلاع کے مطابق نوویں جماعت میں زیر تعلیم محمد ہاشم (17 سال) صبح اسکول جانے کے لئے تیار ہوگیا تھا، لیکن اچانک وہ چکرا کر زمین پر گر پڑا ۔ گھر والے فوراً اس کو قریبی اسپتال لے گئے مگر وہاں پر ڈاکٹروں نے اس کی موت واقع ہونے کی تصدیق کی ۔ گھر والوں کو یقین نہیں آیا اور وہ لڑکے کو زندہ پانے کی امید میں موکّا کے پرائیویٹ اسپتال لے گئے ۔ مگر وہاں بھی ڈاکٹروں نے دل کا دورہ پڑنے سے موت واقع ہونے کی تصدیق کی ۔
موکّا کے موکّا ہاسپٹل میں تھوڑی دیر کے لئے افراتفری کا ماحول پیدا ہوگیا کیونکہ گھر والے ہاشم کی میت گھر لے جانا چاہتے تھے مگر موکّا ہاسپٹل کے ڈاکٹر اس کا پوسٹ مارٹم کرنے پر اصرار کر رہے تھے ۔ پھر سابق ایم ایل اے محی الدین باوا نے مداخلت کی اور میت کی تجہیز و تدفین کے انتظامات کیے گئے ۔
یہاں یہ بات قابل ذکر ہے کہ کورونا مرض کی وباء کم ہونے کے بعد کم عمر بچوں اور نوجوانوں اور خاص کر باڈی بلڈروں پر اچانک دل کا دورہ پڑنے کے واقعات میں اضافہ دکھائی دے رہا ہے۔ اسکولی بچوں کے اچانک فوت ہونے کے واقعات نے والدین کو بڑی تشویش میں مبتلا کر دیا ہے۔ اس ضمن میں طبی ماہرین کی طرف سے کوئی تجزیہ تا حال سامنے نہیں آیا ہے۔
