گلبرگہ 7؍ اپریل (ایس او نیوز/پریس ریلیز ):سینئر کانگریس رہنما ڈاکٹر ملیکارجن کھرگے نے اس بات پر سخت ناراضگی ظاہر کی ہے کہ بی جے پی ہندوستانی فوج کو مودی کا غلام سمجھتی ہیں۔  گلبرگہ میں کانگریس ہیڈ کوارٹر پر ڈاکٹر ملیکارجن کھرگے نے اپنے بارے میں ایک کتابچہ ’’کایک یوگی‘‘ کی رسم اجراء کے موقع پر خطاب کرتے ہوئے کہا کہ  بی جے پی لیڈر اقتدار کے نشے میں اس قدر چور ہیں کہ وہ ہندوستانی فوج کو اپنی فوج کہہ رہے ہیں ۔ کھرگے کے مطابق کوئی بھی فوج کسی لیڈر کی نہیں بلکہ اس ملک کی ہوتی ہے۔

کھرگے نے اس بات پر بھی سخت ناراضگی کا اظہار کیا کہ یو پی کے وزیر اعلیٰ یوگی آدتیہ ناتھ نے ہندوستانی فوج کو مودی سینا کہہ کر ہندوستانی فوج کی توہین کی ۔ کھرگے نے آتیہ ناتھ کے اس بیان کی سخت مذمت کرتے ہوئے  انھیں  سز ا دلانے کا مطالبہ کیا ۔کھرگے نے کہا کہ  نریندر مودی بھی تکبر اور گھمنڈ میں سارے ملک کواپنی ذاتی جاگیر سمجھنے لگے ہیں۔ جو بھی ان پر یا حکومت پر تنقید کرتا ہے تو وہ اسے غدار قرار دیتے ہیں ۔کھرگے نے کہا کہ  بی جے پی ہماری فوج کو اپنی غلام سمجھتی ہے ، یہ لوگ ہندوستانی تہذیب اخلاق اور روایات کا مذاق اُڑا رہے ہیں اور خود کو ہندو تہذیب کا علمبردار قرار دیتے ہیں ۔ انہوں نے سوال کیا کہ کیا تہذیب انھیں یہی سکھاتی ہے کہ ملک کے بہادر فوجیوں کو اپنی سینا قرار دے کر ان کے بے عزتی کی جائے ۔ انہوں نے آگے کہا کہ ہندوستان کے مہذب عوام انھیں کبھی معاف نہیں کریں گے ۔ 

ملیکارجن کھرگے نے   کتاب کی رسم اجرائی کے موقع پر  کتاب کے مصنف کے بسواراج بودی ہال کو معلوماتی کتابچہ مرتب کرنے پر مبارکباد دی اور کتابچے میں شامل جسٹس جویس ریبریو آئی پی ایس رٹائرڈ کے تاثرات کا حوالہ دیتے ہوئے آزاد ی کے بعد سے آج تک ملک کی ترقی کے لئے کانگریس کی طویل جدوجہد کا ذکر کیا۔ جسٹس جویس نے ریبریو نے کہا ہے کہ مودی اکثر یہ سوال اُٹھاتے ہیں کہ کانگریس کے گذشتہ 60برسوں کے دوران ملک نے کیا حاصل کیاہے، انھوں نے بی جے پی کے سوال کا منہ توڑ جواب دیا ہے۔ آزادی کے بعد ہر میدان میں پسماندہ ملک کی تعمیر نو سے لے کر اسے ترقی کی بلندی پر پہنچانے کا سہرا صرف اور صرف کانگریسی قیادت کے سر  ہے ۔

ملیکارجن کھرگے نے کہاکہ جسٹس جویس ریبریو کے اس جواب کو ایک ایک ووٹر تک پہنچا کر بی جے پی کو بے دخل کرکے ملک میں جمہوریت اور دستور کو بچانے کا کام کیا جانا چاہئے ۔ ڈاکٹر ملیکارجن کھرگے نے کہاکہ لوک سبھا میں قائد حزب مخالف کی حیثیت سے وہ وزیرا عظم نریندر مودی کے ہر جھوٹ کا حقائق اور اعداد و شمار کے ذریعے پردہ فاش کرتے رہے ہیں ۔ مودی جی نے  پورے پانچ سال اپوزیشن کو برا بھلا کہنے ، جھوٹے الزامات لگانے اور دھمکانے میں گزار دیئے ۔ جب بھی ان سے ان کے کام کے بارے میں سوال کیا گیا وہ پچھلی حکوت کو کوسنے لگتے ہیں ۔ انھوں نے کہاکہ ملک میں وزیراعظم آتے اور جاتے ہیں لیکن فوج کو اپنا غلام نہیں کہہ سکتے ، فوج ملک کی سرحد چھوڑ کر کہیں نہیں جاتی اپنا خون دے کر ملک کی حفاظت کرتی ہے ۔ ڈاکٹر ملیکارجن کھرگے نے کہاکہ مصنف نے کتابچے میں ان کے کاموں پر بھی روشنی ڈالی ہے جو انھوں نے شہر گلبرگہ کے عوام کے آشیرواد سے انجام دیئے ہیں ۔ انھوں نے پارٹی کے کارکنوں سے اپیل کی کہ وہ ہر بوتھ میں بہتر پولنگ کروائیں تاکہ ان کی جیت کے ووٹوں کا تناسب بڑھ سکے ۔

مصنف بسواراج کے بودیہال نے کہاکہ ملیکارجن کھرگے اس علاقے کے ہی نہیں قوم کے ایک بڑے قائد ہیں ۔ ان کی خدمات سے نئی نسل تحریک حاصل کرسکتی ہے ۔ سنہیا منشیٹی نے نظامت کی ۔ اس موقع پرکھرگے صاحب اور دیگر مہمانوں کی گلپوشی اور شال پوشی کی گئی ۔ تپن اپا کمکنور نے اپنی تقریر میں ملیکارجن کھرگے کو ہر طبقہ کا پسندیدہ لیڈر قرار دیااور کہاکہ مستقبل میں بھی گلبرگہ ترقی کے نئی چوٹیاں سر کرے گا ۔ سابق وزیر ڈاکٹر شرن پرکاش پاٹل نے کتاب کی رسم اجراء انجام دی ۔ جگدیو گتہ دار (صدر ضلع کانگریس ) کے علاوہ کے بی شانپا ، بابو راؤ جاگیر دار ،ماروتی مالے ، شرنو مودی ، الم پربھو پاٹل ، شفیق احمد شبو ، رام گوپال ریڈی ، شکیل نعمانی ، بھیم ریڈی پاٹل اور سینئر صحیفہ نگار جناب حامد اکمل ایڈیٹر ایقان ایکسپریس نے جلسہ میں شرکت کی ۔