مرڈیشور میں 8 مارچ کو مہاشیوراتر ی ؛ مشہور گلوکارہ اننیا بھٹ بھی مدعوئین میں شامل
بھٹکل 6/مارچ (ایس او نیوز)اُترکنڑا ضلع انتظامیہ نے 8 مارچ کو معروف سیاحتی مقام مرڈیشور میں مہا شیوراتری کو منفرد انداز میں منانے کے لیے تمام تیاریاں مکمل کر لی ہیں، اس تعلق سے اخبارنویسوں سے گفتگو کرتے ہوئے بھٹکل اسسٹنٹ کمشنر ڈاکٹر نینا نے بتایا کہ 8 مارچ کو منعقدہ مہاشیو راتری کے دن مرڈیشور بیچ کے قریب عظیم الشان اسٹیج تیار کیا جارہا ہے اور پروگرام میں مذہبی گیت گانے میں مشہور اننیا بھٹ کو مدعو کیا گیا ہے، اس کے ساتھ ساتھ کئی دیگر فنکار بھی مدعوئین کی فہرست میں شامل ہیں ۔
اسسٹنٹ کمشنر نے بتایا کہ مقامی فنکاروں کو بھی موقع دیا جا رہا ہے اور توقع ہے کہ باصلاحیت فنکار اپنے منفرد فن کا مظاہرہ کریں گے۔ فنکاروں کے لیے کھانے اور رہائش کا انتظام کیا گیا ہے۔ بھگوان شیو کے تعلق سے تفصیلات کو کو لیزر بیم کے ساتھ ڈسپلے کرنے کی بھی تجویز ہے۔
پروگرام میں ریاست بھر سے عقیدت مند مرڈیشور میں منعقدہ مہاشیوراتری میں شریک ہونے کی توقع ہے اور ایک اندازے کے مطابق پانچ سے چھ ہزار لوگ اس خصوصی تقریب میں شریک ہوں گے۔