بھٹکل 23/مارچ (ایس او نیوز) بھٹکل ہوناور حلقہ میں 2,25,128 ووٹرس ہیں جن میں 1,14,053 مرد اور 1,11,075 خواتین شامل ہیں۔اخبارنویسوں سے گفتگو کرتے ہوئے بھٹکل الیکشن آفسر اور بھٹکل اسسٹنٹ کمشنر ڈاکٹر نینا نے بتایا کہ جن کی عمر ١٨ سال مکمل ہوچکی ہے، وہ ابھی بھی اپنے نام ووٹرلسٹ میں شامل کرکے لوک سبھا انتخابات میں حصہ لے سکتے ہیں اورچونکہ اُترکنڑا میں پرچہ نامزدگی داخل کرنے کی آخری تاریخ 19 اپریل ہے، اور پرچہ نامزدگی داخل کرنے سے دس دن پہلے تک نام شامل کرنے کی اجازت دی گئی ہے، اس بنا پربھٹکل سمیت اُترکنڑا کے عوام کے لئے ووٹرلسٹ میں نام داخل کرنے کی آخری تاریخ 9/ اپریل ہے۔ نئے نام داخل کرنے کے لئے فارم نمبر 6 کو پُر کرنا ہوگا۔ نئے نام داخل کرنے کے خواہشمند الیکشن کمیشن کے موبائل ایپ کا بھی استعمال کرکے خود ہی اپنا نام ووٹرلسٹ میں داخل کرسکتے ہیں۔(یاد رہے کہ بھٹکل میں  جماعت اسلامی ہند کے زیر نگرانی دعوت سینٹر، سلطان اسٹریٹ، میں ووٹرلسٹ میں نام داخل کرنے کا کام کافی عرصہ سے جاری ہے، ضروری دستاویزات کے ساتھ یہایہاں پہنچ کر بھی اپنے  نام ووٹرلسٹ میں شامل کرسکتے ہیں)

الیکشن آفسر ڈاکٹر نینا نے بتایا کہ بھٹکل میں 7/مئی کو ہونے والے انتخابات کے لئے حلقہ میں کل 248 پولنگ بوتھ بنائے گئے ہیں۔ پولنگ بوتھوں کی حساسیت کو مدنظر رکھتے ہوئے سی سی ٹی وی کیمرے بھی نصب کئے جائیں گے۔ بھٹکل ہوناور حلقہ میں 4,626 لوگ پہلی بار اپنی حق رائے کا استعمال کریں گےجن میں 2,333 مرد اور 2,293 خواتین ہیں۔

بھٹکل ہوناور حلقہ میں کل 4,965 ووٹرس ایسے ہیں جن کی عمر 85 سال یا اس سے زائد ہے، جن میں بعض معذور افراد بھی شامل ہیں، سرکار کی طرف سے ان کے لئے گھربیٹھے ووٹ دینے کی سہولت فراہم کی گئی ہے۔ اس کے لئے ووٹنگ سے چار پانچ دن پہلے ہی متعلقہ الیکشن آفسرس متعلقہ گھروں میں پہنچ کر بیلٹ پیپر میں ووٹ لیتے ہیں۔

بزرگ اور معذور لوگوں کے لئے گھربیٹھے ووٹنگ کی سہولت کی شروعات اسمبلی انتخابات سے کی گئی ہےاب پہلی بار اسے پورے ملک میں لوک سبھا انتخابات میں لاگو کیا جارہا ہے۔

الیکشن آفسر ڈاکٹر نینا نے بتایا کہ اترا کنڑ لوک سبھا حلقہ میں 7 مئی کو ووٹنگ ہوگی جس کے لیے نوٹیفکیشن 12 اپریل کو جاری کیا جائے گا اور پرچہ نامزدگی داخل کرنے کی آخری تاریخ 19 /اپریل ہے۔ کاغذات نامزدگی واپس لینے کی آخری تاریخ 22 اپریل ہے۔

بھٹکل چونکہ اُترکنڑا کی سرحد پر واقع ہے اور بھٹکل سے لگ کر ایک طرف اُڈپی ضلع کی سرحد ہےاور دوسری طرف شموگہ کی بھی سرحد لگتی ہے، جس کو دیکھتے ہوئے بھٹکل۔ ہوناور حلقہ میں بین ضلعی سرحدی چیک پوسٹوں پر چیکنگ تیز کردی گئی ہے۔ اس حلقے میں تین چیک پوسٹوں کو متحرک کیا گیا ہے جن میں سے ایک ہوناور تعلقہ میں گیرسُوپا، دوسرا بھٹکل کا سرپن کٹہ اورتیسرا بھٹکل تعلقہ کے کُنٹوانی میں چیک پوسٹ پر چیکنگ کی کاروائی شروع کی گئی ہے۔ جوبھی سوار ی ضلع اُترکنڑا میں داخل ہوگی، اُن سواریوں کی چیکنگ ہوگی۔ الیکشن آفسر نے بتایا کہ ایک عام شخص کو بغیردستاویزات پچاس ہزار تک کی رقم اپنے پاس رکھنے کی اجازت ہوگی، اس سے زائد رقم ہونے کی صورت میں رقم کی دستاویزات شوکرنے ہوں گے کہ وہ کیسی رقم ہے۔ اسی طرح رقم کے ساتھ اگر سیاسی پارٹیوں کے جھنڈے، پوسٹرس یا ایسی کوئی بھی اشتہاری چیز پائی جانے کی صورت میں رقم بھی ضبط کرلی جائے گی بھلے رقم پچاس ہزار یا پچاس ہزار سے کم ہی کیوں نہ ہو۔

الیکشن آفسر نے واضح کیا کہ چیک پوسٹوں کے علاوہ پولیس، ویجیلنس ٹیم اور ویڈیو سرویلنس ٹیمیں ضلع بھر کی نگرانی کررہی ہیں۔ مختلف محکموں کے افسران کو نوڈل آفیسر کے طور پر مقرر کیا گیا ہے اور ان کی موجودگی میں ضلع میں داخل ہونے والی گاڑیوں کا معائنہ کیا جا رہا ہے۔

انہوں نے کہا کہ انتخابی ضابطہ اخلاق کی کسی بھی خلاف ورزی بشمول ووٹروں میں نقدی، گھریلو اشیاء اور شراب کی تقسیم کی معلومات اگر کسی کو ہو تو وہ  سی-وِجل ایپ کے ذریعے عہدیداروں کو خبر دے سکتا ہے۔ انہوں نے مزید کہا کہ عوام متعلقہ ایپ کے ذریعے ویڈیوز اورتصاویر بھی اپ لوڈ کر سکتے ہیں۔

سوویدھا ایپ استعمال کرنے کی اجازت
انہوں نے کہا کہ سیاسی پارٹیوں کو میٹنگز اور دیگر انتخابی سرگرمیوں کو منظم کرنے کے لیے سوویدھا ایپ کی مدد سے پیشگی اجازت لینی ہوگی۔ عوامی جلسوں، تقاریب، ریلیوں، موبائل گاڑیوں، لاؤڈ اسپیکر، ہیلی کاپٹر اور ہیلی پیڈ کے لیے سُوویدھا سافٹ ویئر کے ذریعے یا ڈی سی آفس یا اے سی آفس سے اجازت لینی ہوگی۔

بھٹکل حلقہ میں انتخابی ضابطہ اخلاق کو سختی سے نافذ کرنے کے لیے 25 افسران کو زونل افسران کے طور پرنامزد کیا گیا ہے۔ ضابطہ اخلاق کی کسی بھی خلاف ورزی کی صورت میں،عوام ٹول فری نمبر 1950 پر کال کر کے شکایت درج کراسکتے ہیں۔

مجموعی طور پر 6 فلائنگ اسکواڈ ٹیم، ٩ سٹیٹک سرویلنس ٹیم، تین ویڈیو سرویلنس ٹیم (VST)، ایک ویڈیو ویونگ ٹیم (VVT)، C-Vigil ٹیم اور اخراجات کی ٹیمیں تشکیل دی گئی ہیں۔

کنٹرول رومز
بھٹکل اسمبلی حلقہ میں کنٹرول روم قائم کیے گئے ہیں۔ لوگ شکایات یا کسی بھی مدد کے لیے ان نمبروں پر ڈائل کر سکتے ہیں۔
بھٹکل اسسٹنٹ کمشنر آفس (08385 223722)
بھٹکل تحصیلدار آفس (08385 226422)
ہوناور تحصیلدار آفس (08387 220262)