سیاحوں کی موجودگی میں کنداپور کا ایک شخص مرونتے سمندر میں ڈوب کر ہلاک ؛نعش برآمد
کنداپور7/جولائی (ایس او نیوز) یہاں تعلقہ کے مرونتے بیچ پر ایک شخص نے سیاحوں کی موجودگی میں سمندر میں گرگیا جس کی شناخت کنداپور ۔ مارن کٹے کے قریب چتور کے رہنے والے چیتن شٹی ابن ویٹھل شٹی (43) کی حیثیت سے کی گئی ہے۔ واردات اتوار کی دوپہر پونے تین بجے پیش آئی ۔
اطلاع کے مطابق مرونتے بیچ پر کافی لوگ سیاحت کے لئے جمع تھے اور سمندری موجوں سے لطف اُٹھارہے تھے کہ اس دوران اچانک ایک شخص سمندر میں گرگیا، اور بحر عرب کی موجوں میں ڈوبنے لگا۔ چونکہ ساحلی کرناٹکا میں کافی دنوں سے موسلادھار بارش کا سلسلہ جاری ہے، سمندری موجوں میں کافی جوش پایا جارہا ہے، سیاح اسے بچانے کے لئے آگے بڑھنا چاہتے تھے مگر سمندر میں اونچی اُٹھتی لہروں نے اُن کے قدم روک دئے، البتہ بعض سیاحوں نے اس موقع پر فوری بیندور پولس تھانہ کو فون کرکے واقعے کی جانکاری دی اور پل بھر میں گنگولی پولس، کوسٹل سیکوریٹی پولس، کراولی نوکا دل (کے این ڈی) سمیت فائر بریگیڈکا عملہ موقع پرپہنچ گیا۔
مقامی لوگوں کی مدد سے سمندر میں کودنے والے شخص کو باہر نکالا گیا، مگر اُس وقت تک وہ اپنی آخری سانسیں لے چکا تھا۔
ذرائع نے بتایا کہ چیتن کی جیپ میں موجود کاغذات کی مدد سے اُس کی شناخت کی گئی اور بعد میں پولس نے گھروالوں کو واردات کی خبر دی۔
چیتن کے بارے میں بتایا گیا ہے کہ وہ شادی شدہ اور ایک بچے کا باپ تھا۔ چھ سال تک دبئی میں ملازمت کی تھی مگر پچھلے چار سالوں سے وہ گاوں میں ہی تھا اور نوکری نہ ملنے پر پریشان تھا۔
پولس نے نعش کو سمندر سے برآمد کرنے کے بعد کنداپور سرکاری اسپتال بھیج دیا ہے جہاں پر پوسٹ مارٹم کے بعد نعش گھروالوں کے حوالےکی جائے گی۔
نعش کو باہر نکالنے کے موقع پر بیندور کے سرکل پولس انسپکٹر پرمیشور گنگا، گنگولی پی ایس آئی واسپا نائک، فائر بریگیڈ کے اہلکار ، گنگولی کوسٹل سیکوریٹی پولس کے اہلکار، کے این ڈی ممبرس سمیت کافی لوگ بھی موجود تھے۔
گنگولی پولس تھانہ میں واقعے کے تعلق سے معاملہ درج کیا گیا ہے اور پولس مزید چھان بین کررہی ہے۔