بنگلور 25 جون (ایس او نیوز) کورونا وائرس سے فوت ہونے والے مریض کی آخری رسومات  میں شرکت کرنے اور عوام میں بیداری لانے کا خیال آیا۔ اس لیے میں نے ایک بزرگ خاتون کی تدفین میں شامل رہا۔ یہ باتیں سابق ریاستی وزیر صحت و کانگریس رکن اسمبلی یو ٹی قادر نے کہیں۔

خود کی حفاظت کا پوشاک (پی پی ای کٹ) پہنے بغیر آخری رسومات میں یوٹی قادر کی شرکت پر مختلف حلقوں سے تنقید کی گئی، ایک ذمہ دار عوامی نمائندہ ہونے کے پیشِ نظر یو ٹی قادر کو ہدفِ تنقید بنایا گیا۔ ان تنقیدوں کا جواب دیتے ہوئے دکشن کنڑا ضلع منگلور میں میڈیا سے بات چیت کے دوران قادر نے واضح الفاظ  میں کہا کہ منگلور میں کووِڈ سے ایک خاتون کی موت ہوئی، اس تدفین میں شامل ہوکر میں نے عوام کو یہ پیغام دینے کی کوشش کی ہے کہ "کو رونا وائرس سے فوت ہونے والے مریض کے مردہ جسم سے وائرس نہیں پھیلتا۔ مردہ جسم سے وائرس پھیلنے کے سلسلہ میں کسی بھی طبی مطالعہ اور رپورٹ میں نہیں کہا گیا ہے، اس لیے میں نے پی پی ای ٹی جٹ پہنے بغیر کفن دفن میں شامل ہوا۔

انہوں نے کہا کہ کورونا وائرس کا خوف عوام میں اس قدر تشویش ناک صورتحال اختیار کر گیا ہے کہ بچے اپنے باپ کا آخری دیدار کرنے سے ڈر محسوس کر رہے ہیں۔ مذہبی رسوم ادا کرنے سے بھی لوگ کترا رہے ہیں۔ یو ٹی قادر نے کہا کہ یہ سچ ہے کہ کووِڈ پروٹوکال کے تحت پی پی ٹی ای کٹ پہننا لازمی ہے، نہ پہنناغلط ہے۔ لیکن یہ بات یاد رکھیں کہ کورونا وائرس سے مرنے والے کے مردہ جسم سے وائرس نہیں پھیلتا، اس پیغام کو عوام تک پہنچانے کے مقصد سے میں نے پی پی ٹی ای کٹ نہیں پہنا۔ عوام کو چاہئے کہ وہ مذہبی طریقہ سے اپنے مُردوں کی تدفین یا آخری رسومات ادا کریں۔ انہوں نے مزید کہا کہ آنے والے تین مہینے انتہائی حساس ہیں۔ دکشن کنڑا ضلع انتظامیہ میں مناسب تبدیلی  لائی جائے۔ عوام سے یہ کہا جائے کہ تمام دکانیں کھولنا ضروری نہیں بلکہ اشیائے ضروریہ کی دکانیں کھولی جائیں۔

کل جمعرات سے ہو رہے ایس ایس ایل سی امتحانات کے سلسلہ میں انہوں نے کہاکہ حکومت پیشگی احتیاطی اقدامات پر بھرپور توجہ دے۔ اسکول کے اطراف و اکناف 50 میٹر تک مکمل بند کرنے کی ہدایت دی جائے۔ امتحان ہال لانے والے طلبہ کے والدین کی جانب بھی توجہ مبذول کرنی ہوگی۔ سینی ٹائزیشن کے لیے سلون میں استعمال میں آنے والے اسٹرے سے کام چلایا جارہا ہے، اس بارے میں ضلع انتظامیہ کو آگاہ کیا ہوں۔