کاروار29؍مارچ (ایس او نیوز) ضلع ڈپٹی کمشنر ایس ایس نکول نے کاروار بلدیہ کے صدر اور اراکین کے ساتھ منعقدہ نشست میں خطاب کرتے ہوئے کہا کہ کاروار میں مچھلی مارکیٹ اور کمرشیل کامپلیکس کی تعمیر شروع کرنے کے لئے وہاں پر موجوددکانوں کو فوری طور پر خالی کروایا جائے۔

خیال رہے کہ کاروارمیں جدید سہولتوں کے ساتھ نئی مچھلی مارکیٹ اور کمرشیل کامپلیکس تعمیر کرنے کا 8کروڑ روپے لاگت والامنصوبہ ابھی تک اس لئے کھٹائی میں پڑا ہوا ہے کیونکہ جس جگہ تعمیرات ہونی ہے وہاں پر موجود مٹن اور چکن کے علاوہ دیگر103 دکان داروں کی لیز ختم ہوجانے کے باوجود بلدیہ کی طر ف سے ابھی تک انہیں خالی نہیں کروایا جاسکا ہے ۔ ڈی سی نے کہا کہ دکانیں خالی کروانے کا کام مکمل ہوتے ہی تعمیری منصوبے پر عمل شروع کیا جائے گا۔

جب ڈی سی نے کہا کہ سنیچرسے ہی دکانیں خالی کروانے کا سلسلہ شروع کیا جائے تو بلدیہ کمشنر نے بتایا کہ کچھ دکان داروں نے عدالت سے اسٹے حاصل کرلیا ہے، اس لیے خالی کروانا ممکن نہیں ہے۔ اس کے جواب میں ڈی سی نے کہا کہ چونکہ لیز کی مدت ختم ہوچکی ہے اس لئے عدالت سے ملا ہوا اسٹے رد کروانا آسان ہے۔ اس کے علاوہ جن15 دکانوں کو اسٹے ملا ہے ، ان کو چھوڑ کر باقی دکانیں ابھی کروالی جائیں۔ بلدیہ کے اراکین نے اس تجویز سے پوری طرح اتفاق کیا۔ڈی سی نکول نے بلدیہ کے ذمہ داران کو بتایا کہ دکانیں خالی ہوتے ہی ٹینڈر طلب کیے جائیں گے اور جولائی کے آخر تک ورک آرڈر جاری کرتے ہوئے 15اگست سے تعمیرات کا آغاز کیا جائے گا۔انہوں نے کہا کہ مچھلی مارکیٹ کی تعمیر کے ساتھ بلدیہ کو مالی منافع اور آمدنی بڑھانے کی نیت سے اس جگہ کمرشیل کامپلیکس کی تعمیر کو منصوبے میں شامل رکھا گیا ہے۔

بعض بلدیہ اراکین نے ڈی سی کے سامنے مانگ رکھی کہ پرانے دکانداروں کو نئے کامپلیکس میں ترجیحی بنیاد پردکانیں الاٹ کی جائیں تو ڈی سی نے جواب دیا کہ چونکہ ان دکانداروں کی لیز کی میعاد ختم ہوچکی ہے اس لئے قانونی طور پر انہیں ترجیح دینے کی گنجائش موجود نہیں ہے ۔ البتہ وہ لوگ نیلامی کے ذریعے دکانیں حاصل کرسکیں گے۔