بحیرہء عرب میں بحریہ کے دستے، کوسٹ گارڈ کمانڈروں کی گشتی میں اضافہ،سخت حفاظتی اقدامات: ملک کے ساحل پر قزاقوں کے حملوں میں اضافہ
کاروار :8؍ جنوری (ایس اؤ نیوز )بحیرہء عرب میں قزاقوں کے خطرے کو دیکھتےہوئے اترکنڑا ضلع کے ساحلی کناروں پر حفاظتی اقدامات میں اضافہ کیاگیا ہے۔ بحریہ دستوں اور کوسٹ گارڈ کمانڈو کے ذریعے بحیرہء عرب میں نگرانی کوچوکس کرتےہوئے مختلف انٹلی جنس ایجنسیوں کے ذریعے کڑی نگرانی کی جارہی ہے۔
کاروار میں واقع سی برڈ بحریہ اڈہ ، ایشیا کا سب سے بڑا حفاظتی منصوبہ ہےاور اس کا شمار ایک شدید حساس علاقوں میں ہوتا ہے۔ گوا کی سرحد سے منگلورو تک بحریہ دستہ اور کوسٹ گارڈ کے دستے روزانہ گشت لگارہے ہیں۔ مگر اسرائیل سے تعلق رکھنے والی تجارتی جہازوں پر حوثی باغیوں کی جانب سے حملہ کے بعد حفاظتی اقدامات کو مزیدچوکس کرتےہوئے سیکیورٹی کو مضبوط کیا گیا ہے۔ ہندوستانی بحریہ نے ڈرون حملوں کو روکنے اور دشمن کے خطرے سے نمٹنے کےلئے ہتھیار لیس جہازی دستہ کوتعینات کیا ہے۔حالیہ دنوں میں ملک کے مغربی ساحل کے کنارے سے 77ناٹیکل میل دور اور گجرات کے پور بندر پر تجارتی جہازوں پر ڈرون حملہ ہواتھا۔
سمندری علاقوں میں چلنے والے تجارتی جہازوں، ٹگ اور بین ریاستی مشتبہ ماہی گیر کشتیوں کی کڑی نگرانی کی جارہی ہے۔ صرف سمندری علاقوں میں ہی نہیں بلکہ سمندری ساحل پر اور بحریہ منصوبے کے علاقوں سمیت حساس مقامات پر بھی حفاظتی اقدامات سخت کئے گئے ہیں اور کڑی چوکسی برتی جارہی ہے۔