26اور27فروری کو بنگلورو میں بڑے پیمانے پر روزگار میلے کا انعقاد: 50،000سے زائد روزگار کا موقع : عمر اور تعلیم کی کوئی قید نہیں ،ہرکوئی شریک ہوسکتاہے:ڈپٹی کمشنر کا بیان
کاروار :20؍فروری (ایس اؤ نیوز ) بنگلورو کے پیالیس گراؤنڈ میں فروری 26اور27کو ریاستی حکومت کے اسکِل ،تجارتی فروغ اور اقتصادی محکمہ اور کرناٹکا اسکل ڈیولپمنٹ نگم کے اشتراک سے بڑے پیمانے ’یوا سمردھی سمیلن ‘ روزگار میلہ منعقد ہونے جارہاہے۔ میلے میں 50،000 سے زائد افراد کو روزگار فراہم کرنے کا منصوبہ ہے ۔ اترکنڑا ڈی سی گنگوبائی مانکر نےضلع کے نوجوانوں سے اپیل کی ہے کہ نوجوان اس میلےمیں شریک ہوکر اپنی پسند کا روزگار حاصل کریں اور موقع سے فائدہ اٹھائیں۔
ڈی سی دفتر میں منعقدہ میٹنگ کی صدارت کرتےہوئےانہوں نےکہاکہ بنگلورو میں منعقد ہونےوالےروزگار میلےمیں 500سے زائد کمپنیاں شریک ہونگی۔ تعلیمی اہلیت و لیاقت کی بنیاد پر 50،000سے زائد روزگار فراہم کرنے کا منصوبہ ہے۔ جائے وقوع پر ہی 20،000سے زائد روزگار مستقل کے آرڈر دئیے جائیں گے۔ منتخب شدہ سبھی افراد کو ریاستی حکومت کےمزدور تنخواہ اصول کے مطابق کم سے کم تنخواہ کے ساتھ بہتر تنخواہ کا پیکیج بھی دئیےجانے کی جانکاری دی ۔
اترکنڑا ضلع کے بے روزگار نوجوانوں اور روزگار کی تلاش میں سرگرداں نوجوانوں سے ڈی سی گنگوبائی نے اپیل کی ہے کہ وہ متعلقہ ویب سائٹ https://skilconnect.kaushalkar.com پر اپنا نام رجسٹرڈ کریں اور اس سلسلےمیں اگر انہیں کوئی پیچیدگی ہے تو مفت سروس نمبر 18005999918پر صبح 10بجے سے شام 6بجے تک رابطہ کریں۔ انہوں نے بتایا کہ متعلقہ روزگار میلے میں کوئی تعلیمی اہلیت اور عمر کی حد طئے نہیں کی گئی ہے ، تعلیمی اہلیت نہیں رکھنے والے اور کسی بھی عمر کے افراد اس میلےمیں شریک ہوکر روزگار پاسکتےہیں۔ ضلع کے سبھی کالج، شہروں اور مقامی اداروں،گرام پنچایتوں کے ذریعے اس کی بہتر تشہیر کی جائے گی تاکہ ضلع کے زیادہ سے زیادہ بے روزگار نوجوان اس روزگار میلے میں شریک ہوں اور زیادہ روزگار حاصل کریں ۔میٹنگ میں اپر ڈی سی پرکاش راجپوت، ضلع اسکل افسر جی ٹی نائک، ضلع روزگار افسرسمیت مختلف محکمہ جات کے افسران موجود تھے۔