کاروار  :۲۰؍فروری   (ایس اؤ نیوز )  بھارتی فوج کے ’اگنی ویر‘ میں شامل ہونے کے خواہش مند نوجوانوں کو ضلع انتطامیہ کی جانب سے مفت میں تربیت سمیت ہر طرح کا تعاون کیاجائے گا۔ فوج میں بھرتی میں  شامل ہوکر جرأت وحوصلہ مند روزگار کے ساتھ ملکی حفاظت جیسے بڑے فرض کی ادائیگی کےلئے ضلع کے نوجوان آگے بڑھیں۔ اس بات کی اپیل  اترکنڑا ضلع ڈی سی گنگوبائی مانکر نے  کی۔

 ڈی سی دفتر میں منعقدہ میٹنگ کی صدارت کرتےہوئے ڈی سی نےکہاکہ منگلورو میں واقع بھارتی فوجی  دفتر  کی جانب سے اگنی ویر کےلئے عرضیاں مطلوب ہیں ، ضلع کے نوجوان بھی اپنی درخواست دے سکتےہیں۔خواہش مند نوجوان  13فروری سے 22مارچ تک آن لائن عرضی داخل کرسکتےہیں۔ www.joinindianarmy.nic.in ویب سائٹ کے ذریعے عرضی داخل کرسکتےہیں۔ عرضی داخل کرنےوالے اہل افراد کا پہلے مرحلےمیں تحریری امتحان ہوگااس کے بعد فوج میں بھرتی کےلئے ’تعیناتی ریلی‘ ہوگی۔

ڈی سی نے بتایا کہ اگنی ویر کے لئے عرضی دینےو الے نوجوانوں کو ضلع کے سبھی 35ناڈ دفاتر (مقامی دفاتر)کے ذریعے عرضی داخل کرنے میں تعاون کیا جائے گا اور عرضی داخل کئے امیدواروں کو تحریری ٹسٹ اور جسمانی ٹسٹ کےلئے ضلع کی سابق فوجی فلاحی تنظیم کے ذریعے  تربیت بھی دی جائے گی۔ضلع کے نوجوان زیادہ سے زیادہ اس موقع سے فائدہ اٹھانےکی ڈی سی نے اپیل کی۔

اگنی ویر میں بھرتی ہونے کےلئے کم سے کم 8ویں کلاس  سے ایس ایس ایل سی، پی یوسی ، ڈپلوما ، آئی ٹی آئی تعلیم یافتہ نوجوان عرضی دے سکتےہیں۔ البتہ عرضی دینےو الے نوجوانوں کی عمر 17.5سے 21سال ہو۔ تعلیمی اہلیت کی بنیاد پر ٹکنکل اور عام فرائض کے لئے تقرری ہوگی۔ ڈی سی نے بتایا کہ فوج بھرتی کی کارروائی بہت ہی شفاف طریقے سےہوتی ہے۔ تحریری ٹسٹ اور جسمانی اہلیت ہی فوج میں بھرتی کےلئے پیمانہ ہوگا۔ امیدوار یا نوجوان کسی بھی ایجنٹوں کی باتوں سےدھوکہ نہ کھائیں۔ ضلع کےہرتعلقہ میں موجود سابق فوجی تربیت دیں گے۔ میٹنگ میں اپر ڈی سی پرکاش راجپوت اور دیگر محکمہ کے افسران موجود تھے۔