کاروار  :۲۰؍فروری   (ایس اؤ نیوز ) اترکنڑا ضلع میں ڈرون کا استعمال کرتےہوئے زمینات کی سروے  کی کارروائی شروع کی گئی ہے۔ اور میڈیا رپورٹ کے مطابق  بنگلورو سے تعلق رکھنے والی ایک ایجنسی کے ذریعے ہوناوراور بھٹکل تعلقوں  میں سروے کارروائی انجام دی گئی  ہے۔

رپورٹ کے مطابق آر وی دیش پانڈے  جب  روینیووزیر  تھے تو اس دوران انہوں نے ریاست کے پانچ اضلاع میں جوڈرون سروے کا تجرباتی منصوبہ جاری کیا تھا، ان میں اترکنڑا ضلع بھی شامل تھا۔ سال2019میں ہی منصوبے کو جاری کیاگیاتھا لیکن ضلع میں ڈرون سروے شروع نہیں کیاگیا تھا۔ سال 1930کی مدت میں کئے گئےسروے کے مطابق زمینات کا اصل نقشہ تیارکیاگیا ہے۔ لیکن اس کے بعدوالی  سروے کارروائی  کی تکمیل نہیں ہوئی تھی ۔ مگر اب ضلع میں  ڈرون ٹیکنالوجی کا  استعمال کرتےہوئے سروے کارروائی کو شروع کیاگیا ہے۔ پہلے مرحلے میں بھارتی سروے ادارے کےساتھ معاہدہ کرتےہوئے ایک نجی ایجنسی سروے کارروائی کو انجام دے رہی ہے۔ ایجنسی کا سروے عملہ نے پچھلے چند دنوں سے دیہی علاقوں میں زمینات کے حدود کی نشان دہی شروع کر رکھی ہے۔ ڈرون کے ذریعے زمینات کے واضح حدود کی نشان دہی میں آسانی  کےلئے تعلقہ جات کی سرحد پر سفید رنگ سےنشان لگانے کاکام جاری ہے۔

محکمہ سروے کے سنئیر معاون ڈائرکٹر راجو پجار نے اس سلسلے میں بتایا کہ ہر ایک تعلقہ میں  سرحد کی نشان دہی کے بعد سروے انجام دیاجائےگا۔ اس کے بعد متعلقہ دیہات کا سروے ہوگا پھر ہر ایک پلاٹ کا سروے ہوگا۔ ڈرون سروے کاڈیجیٹلائزیشن کرنے کے بعد نقشہ تیار کیاجائے گا۔ سرکاری ، پرائیویٹ سمیت ہر ایک زمین کا نقشہ ڈیجیٹل بناکر محفوظ کیاجائے گا۔ ڈرون سروے کی مکمل کارروائی شروع ہونےکےلئے مزید وقت  لگنے کی بات کہی گئی ہے۔