بنگلورو،20/فروری(ایس او  نیوز)کرناٹک کی دو خاتون افسروں کے درمیان ذاتیات کو لے کر لڑائی اتوار کے روز ایک بار پھر پستی پر آ پہنچی جب آئی پی ایس آفیسر ڈی روپا مودگل نے آئی اے ایس آفیسر روہنی سندھوری کی کچھ ذاتی تصویریں جو انہوں نے اپنے اقرباء سے شیر کی تھیں فیس بک پر اپ لوڈ کرنے کے ساتھ ساتھ ان پر 19الزامات عائد کئے۔ ان الزامات میں متوفی آئی اے ایس آفیسر ڈی کے روی سے روہنی کے مبینہ تعلقات کا بھی تذکرہ کیا گیا ہے۔روہنی کے خلاف تازہ الزامات کی بوچھار کرتے ہوئے کہا ہے کہ روہنی سندھوری فرض شکنی، کرپشن کی مرتکب ہیں۔ روپا نے ان الزامات کے ثبوت ہونے کا دعویٰ کیا۔روپا نے روہنی سندھوری اور جنتا دل(ایس) رکن اسمبلی سارا مہیش کے درمیان مصالحت پر سوال اٹھایا ہے اور کہا ہے کہ مصالحت کرنے کی کیا ضرورت تھی۔ شاید اس لئے کہ روہنی نے کچھ غلط کیا ہے۔یا کچھ چھپانے کی کوشش کر رہی ہیں۔ کیا وہ اپنی فرض شکنی یا کرپشن چھپا رہی ہیں۔ روپا نے روہنی پر ڈی کے روی اور روپا کے درمیان کئے گئے واٹس ایپ چاٹ، منڈیا ضلع پنچایت کی سی ای ا و کی حیثیت سے ضلع میں بیت الخلاء کی تعمیر میں دھاندلی کرنے،چامراج نگر ضلع اسپتال میں کورونا بحران کے دوران آکسیجن کی قلت کے سبب 24افراد کی موت کے مرحلہ میں لاپروائی،آئی اے ایس آفیسرس شلپا ناگ،ہرشا گپتا، منی ونن سے جھگڑے،ڈی کے روی کی موت کے بعد آئی پی ایس افسر ہریش سے روہنی سندھوری کی شادی کی افواہ۔رکن اسمبلی سارا مہیش پر روہنی کے بے بنیاد الزامات، میسور کے رکن پارلیمان پرتاپ سمہا پر الزامات۔ متعدد آئی اے ایس افسروں کو روہنی سندھوری نے غیر شائستہ تصاویر روانہ کیں، روہنی سندھوری کے شوہر اور سسر نے اس کے اثر ورسوخ کا استعمال کر کے ملک کے معروف گلوکار لکی علی کی زمین پر قبضہ جمالیا۔ اپنے اثر و رسوخ کا استعمال کر کے روہنی سندھوری اور اس کے شوہر کے بنگلورو میں ریئیل ایسٹیٹ کا کاروبار جما لیا ہے۔روپا کی طرف سے سوشیل میڈیا پر کی گئی الزامات کی بوچھار کے جواب میں روہنی سندھوری نے کہا کہ جس کا دماغی توازن بگڑ جائے اس پر تبصرہ کرنا فضول ہے۔ انہوں نے کہا کہ ذمہ دارانہ عہدوں پر رہنے والوں کو ایسا رویہ نہیں اپنانا چاہئے۔ روپا نے ان سے انتقام لینے کے لئے دماغی توازن گنوا دیا ہے اور جھوٹے الزامات عائد کر رہی ہیں روہنی نے ان کی تصویروں کے بارے میں جو روپا نے فیس بک پر شائع کی ہیں سوال کیا ہے کہ یہ تصویریں کن افسروں کو روانہ کی گئیں ان کے نا م ظاہر کریں۔انہوں نے روپا پر سرویس ضابطہ پامال کرنے کا الزام عالئد کیا اور کہا کہ اس کے خلاف وہ قانونی لڑائی جاری رکھیں گی۔