بنگلورو،18؍مارچ(ایس او نیوز)رواں تعلیمی سال اختتام پذیرہے،نئے تعلیمی سال کوکب سے شرو ع کرناہے،اس معاملہ میں غوروفکرکیاجارہاہے۔ریاستی وزیربرائے بنیادی وثانوی تعلیم ایس سریش کمارنے آج اشارہ دیتے ہوئے کہاکہ آئندہ تعلیمی سال کا آغاز 15جولائی سے ہوگا۔

بروزچہارشنبہ ٹمکورمیں اخباری نمائندوں سے بات چیت کے دوران سریش کمارنے کہاکہ کووڈ۔19کی دوسری لہر کے نتائج دیکھنے کے بعد آئندہ تعلیمی سال کے آغازکے سلسلہ میں غورکیاجائے گا۔انہوں نے عظیم پریم جی یونیورسٹی کی ایک حیران کن سروے رپورٹ کا حوالہ دیتے ہوئے کہاکہ اسکول شروع نہ کئے جانے کی وجہ سے طلبہ ریاضی (میتھس)بھول گئے ہیں۔لیکن حکومت کوبچوں کی صحت اورتعلیم دونوں پرخصوصی اورپوری توجہ دینی ہوتی ہے۔

انہوں نے مزیدکہاکہ اسکول کی نصابی کتب میں بھگوت گیتاکوشامل کرنے کا مطالبہ کیاجارہاہے۔اس بارے میں ماہرین کے ساتھ تبادلہ خیال کرنے کے بعد بھگوت گیتانصابی کتاب میں شامل کرناہے یانہیں اس بارے میں فیصلہ کیاجائے گا۔انہوں نے مزیدکہاکہ پہلی تاپانچویں جماعت شروع نہ کئے جانے کے معاملہ میں نہایت سخت ہدایت دی گئی ہے،اس کے باوجودکہیں کسی پرائیویٹ تعلیمی ادارہ کی جانب سے خلاف ورزی کی شکایت موصوصول ہوتی ہے متعلقہ ادارے کے خلاف سخت کارروائی کی جائے گی۔

انہوں نے یہ بھی کہاکہ یکم مارچ سے پہلی تاپانچویں جماعت کے کلاس شروع کرنے کی دلچسپی مجھے بھی تھی مگرماہرین تعلیم کے ساتھ تبادلہ خیال کرنے کے بعد اس نتیجہ پرپہنچاکہ چھوٹے بچوں کے کلاس شروع نہ کرناہی بہترہے۔اس دوران ریاست میں پھرایک مرتبہ کوروناوائرس کے معاملات میں اضافہ دیکھاجارہاہے،اگرشروع بھی کیاجاتاتو دوبار ہ بندکرناناگزیرہوجاتا۔