ریاست میں کووڈمتاثرین کے معاملات میں غیرمعمولی کمی اعدادوشمارکے فرق کانتیجہ نہیں:سدھاکر

بنگلورو،28؍اکتوبر(ایس او نیوز) ریاستی وزیربرائے طبی تعلیم وصحت ڈاکٹرکے سدھاکرنے کہاکہ آئندہ سال 2021ء کے آغازہی میں کوروناویکسین دستیاب ہونے کی قوی امیدہے۔ریاست کے تمام باشندوں کوکوروناویکسین فراہم کی جائے گی۔

ودھان سودھامیں آج آسٹراجنیکا ادارہ کے نمائندوں کے ساتھ ہوئی میٹنگ کے بعداخباری نمائندوں سے بات چیت کے دوران سدھاکرنے کہا کہ پونے کے سیرم ادارے کے ساتھ آسٹراجنیکاادارے نے معاہدہ کرتے ہوئے کوروناویکسین کا تجربہ شروع کیاہے۔عالمی سطح پرآکسفورڈیونیورسٹی اورآسٹراجنیکانامی کمپنی کے اشتراک سے بننے والی کوروناویکسین کی پہلی کھیپ لگانے کی تیاری کرنے کوکہاگیاہے۔ یہ ویکسین تمام عمرکے افرادمیں قوت مدافعت پیداکرتی ہے اورطبی ماہرین پرامیدہیں کہ جلدہی اس ویکسین کی منظوری ممکن ہے۔سدھاکرنے کہا کہ میسورکے جے ایس ایس میڈیکل کالج کے ساتھ بھی اس ویکسین کے تجربہ کے حوالے سے معاہدہ ہواہے۔

انہوں نے مزیدکہاکہ ہندوستان میں اس کوروناویکسین کا گزشتہ 56دن قبل ہی پہلے مرحلہ کا کامیاب تجربہ ہواہے۔ مزیددوسرے اورتیسرے مرحلہ میں ملک کے 1600افراد پر اس ویکسین کا تجربہ کیاجارہاہے۔اس ویکسین کوفراہم کرنے والے ادارے سے کہاگیاہے کہ وہ کوروناویکسین کے اس تجربہ میں مزید افراد کوشامل کرے۔اس کے علاوہ ریاست میں بھی کوروناویکسین کی تقسیم کے سلسلہ میں بھی تبادلہ خیال کیاگیاہے۔ادارے نے کہا ہے کہ 100 کروڑافراد کوکوروناویکسین دینے کی اہلیت ہے۔ ڈاکٹرسدھاکرنے کہا کہ مرکزی محکمہ برائے صحت کے اشتراک عمل سے ماہرین صحت،تکنیکی ماہرین اورسپلائی کرنے والوں پرمشتمل تجربہ کارماہرین کی تکنیکی (ایپیڈمک ٹکنک)کمیٹی تشکیل دی گئی ہے۔یہ کمیٹی کوروناویکسین کی سپلائی، ذخیرہ اندوزی اورتقسیم کاری کے معاملہ میں صلاح ومشورہ دے گی۔

ڈاکٹرسدھاکرنے واضح طورپر کہاکہ ریاست میں پہلے مرحلہ میں ریاست کے تمام ہیلتھ ورکرس کوکوروناویکسین دینے کی تیاری کرلی گئی ہے۔دوسرے مرحلہ میں بزگوں ودیگرناسازی طبیعت سے دوچارافرادسمیت حاملہ اورزچہ خواتین کوبھی یہ ویکسین دی جائے گی۔انہوں نے کہاکہ کوروناویکسین کی قیمت کے سلسلہ میں بات چیت چل رہی ہے،تاہم ویکسین کے لیے کسی بھی قسم کی کوئی قیمت طے نہیں کی گئی۔

انہوں نے کہا کہ سردست ہماری حکومت کووڈ۔19ٹیسٹ،علاج ودیگراخراجات کا بوجھ اٹھائی ہے،اسی طرح ریاست کے تمام باشندوں کے لیے کوروناویکسین مفت فراہم کرنے کے لیے حکومت تیارہے۔سدھاکرنے کہاکہ پہلے مرحلہ کے تجربہ کے دوران ویکسین دینے کے 28دنوں بعداینٹی باڈی پیداہواہے۔پہلے مرحلہ میں کورونا ویکسین صرف ان لوگوں کودی گئی جن میں کوروناکی کوئی علامت نہیں تھی۔ دوسرے اورتیسرے مرحلہ میں کوروناوائرس سے متاثرہونے والوں کوبھی ویکسین کے تجربہ میں شامل کیاگیاہے۔کوروناویکسین کاکامیاب تجربہ اور مرکزی حکومت سے اجازت حاصل ہونے کے بعدریاست میں کوروناویکسین کے استعمال کے سلسلہ میں مرکزسے بات چیت کی جائے گی۔

انہوں نے کہا کہ کوروناویکسین 5سال کی عمروالوں سے تمام عمرکے افرادمیں تجربہ کرنے کی کوشش ہوگی۔انہوں نے کہاکہ کسی بھی مرض کے لیے ویکسین کی دریافت کے لیے 5تا6سال درکارہوتے ہیں۔لیکن ہمارے ملک میں سات آٹھ مہینوں میں ویکسین دریافت کرنے کی کوشش کی جارہی ہے۔ سدھاکرنے کہا کہ کوروناکے ابتدائی دنوں میں وزیراعلیٰ نے مجھے صحت کا چارج دیاتھا۔اب صحت کا قلمدان مجھے دیاگیاہے، قلمدان لینے کے بعدگزشتہ 10دنو ں کے دوران کورونامعاملات میں غیرمعمولی کمی دیکھی جارہی ہے،اس کمی کوچندلوگ مشتبہ اورمشکوک نظروں سے دیکھ رہے ہیں۔ہم نے اعدادوشماربتانے میں کوئی فرق نہیں کیا۔عالمی ادارہ صحت نے خود کرناٹک حکومت کی شفافیت پرپسندیدگی کا اظہارکیاہے۔