کرناٹک کے بیدر میں بھینس چوری کے معاملے میں 80 سالہ شخص کو پولس نے کیا 58 سال بعد گرفتار
بنگلورو، 14/ستمبر (ایس او نیوز/ایجنسی) 22 سال کی عمر میں بھینس چوری کرنے والے ایک 80 سالہ معمر شخص کو پورے 58 سال بعد پولس گرفتار کرنے میں کامیاب ہوگئی ہے۔ میڈیا رپورٹ کے مطابق یہ واردات کرناٹک کے بیدر کی ہے جبکہ گرفتار شخص کی شناخت گنپتی وٹھل واگھمور کے طور پر کی گئی ہے ۔
رپورٹ کے مطابق 1965 میں مہکر پولیس اسٹیشن میں مرلی دھر راؤ کلکرنی کی جانب سے دو بھینسوں اور ایک بچھڑے کی چوری کا مقدمہ درج کیا گیا تھا۔ واقعہ کے بعد مہاراشٹر کے رہنے والے کشن چندر (30) اور گنپتی وٹھل واگھمور (22) کو گرفتار کیا گیاتھا۔تاہم ضمانت ملنے کے بعد یہ ملزمان عدالت میں آئے بغیر ہی فرار ہوگئے تھے۔ سمن اور وارنٹ جاری ہونے کے باوجود وہ پیش نہیں ہوئے۔ ا س معاملے میں ملوث ملزم کشن چندر 11 اپریل 2006 کو فوت ہوگیا تھا۔ جس کی وجہ سے اُس کے خلاف کیس خارج کر دیا گیا تھا ۔ ایک اور ملزم گنپتی وٹھل کئی برسوں سے روپوش تھا۔ اب ایک خصوصی ٹیم نے گنپتی کا سراغ لگا کر اسے عدالت میں پیش کیا ہے۔ جب چوری کی واردات ہوئی تھی تو گنپتی کی عمر صرف 22 سال تھی۔ اب ان کی عمر 80 سال ہے۔
بیدر ضلع ایس پی چنا بسونّا نے کہا کہ پرانے زیر التوا مقدمات اور ایل پی آر کے مقدمات حل کرنے کے لیے ایک خصوصی ٹیم تشکیل دی گئی ہے جس نے 58 سال پرانے کیس میں ضمانت پر رہا ہونے کے بعد لاپتہ ہونے والے شخص کو اب 80 سال کی عمر میں گرفتار کیا ہے۔