شیموگہ،31؍مئی(ایس او نیوز)حکومت کی نئی رہنما ہدایات کے مطابق کورونا سے متاثرہ ریاستوں سے آنے والوں کیلئے 14دنوں کے بجائے صرف 7دن انسٹی ٹیوشنل کوارنٹائن گزار کر وہ گھر واپس جاسکتے ہیں۔ بقیہ 7دنوں تک انہیں گھر میں ہی کوارنٹائن ہونا پڑے گا۔ ڈپٹی کمشنر کے بی شیو کمار نے یہ بتایا۔ ڈپٹی کمشنر کے دفتر میں جمعرات کو منعقدہ ہیلتھ کمیٹی کی میٹنگ میں وہ تقریر کر رہے تھے۔
انہوں نے کہا کہ اب تک بیرونی ریاستوں سے آنے والوں کیلئے 14 دنوں کا انسٹی ٹیوشنل کوارنٹائن مقرر کیا گیا تھا۔ نئی رہنما ہدایات کے مطابق اب اسے سات دنوں تک گھٹایا گیا ہے۔ انہوں نے کہا کہ فی الحال مختلف ہاسٹلوں میں 553/افراد کوارنٹائن میں ہیں۔ ہر ہاسٹل کا دورہ کرکے 7دنوں کا کوارنٹائن مکمل کرنے و الوں کی صحت کی جانچ کرا ئی جائے۔ ان کے ہاتھوں پر مہر لگا کر انہیں ہوم کوارنٹائن کیلئے روانہ کیا جائے۔ اس کیلئے ہر تعلقہ میں ایک نوڈل آفیسر نامزد کرنے کی انہوں نے ہدایت دی۔
انہوں نے کہا کہ ایسے لوگوں پرمسلسل نگاہ رکھی جائے۔ ان کی فہرست تیار کرکے پی ڈی او رتعلقہ سطح کے افسرو ں کو ر وانہ کیا جائے۔ کوروناکی کثرت والی ریاستوں سے آنے والوں کو چھوڑ کردیگر ریاستوں سے آنے والے لوگوں کو سیدھے گھر روانہ کر کے انہیں ہوم کوارنٹائن کیا جائے اور ان پر سخت نگاہ رکھی جائے۔ نئی رہنما ہدایات کے مطابق ابتدائی ر ابطہ رکھنے والوں کو ہوم کوارنٹائن کیا جائے۔ کوارنٹائن میں جانے سے پہلے انہیں کوارنٹائن واچ ایپ ڈاؤن لوڈ کرنے کی ہدایت دی جائے۔
ضلع پنچایت کے سی ای او ایم ایل وائشالی، اڈیشنل ڈپٹی کمشنر جی انورادھا، میڈیکل کالج کے ڈائرکٹر گرو پادپا،ڈسٹرکٹ ہیلتھ اینڈ فیملی ویلفیر آفیسر ڈاکٹر راجیش سرگی ہلی، ڈسٹرکٹ سروے آفیسر ڈاکٹر شنکرپا اس موقع پرموجود تھے۔