بنگلورو،27جولائی (ایس او نیوز/ آئی این ایس انڈیا) سینئر کانگریسی لیڈر سدا رمیا نے کہا کہ کرناٹک میں بی جے پی کی حکومت آئینی یا اخلاقی طور پر قائم نہیں کی گئی ہے اور اس پورے معاملے کو خرید و فروخت کی جیت بتایا۔ کانگریس پارٹی اراکین کے لیڈر سدا رمیا نے بی جے پی پر حکومت بنانے کے لئے گورنر کے عہدے کے غلط استعمال کا الزام لگایا۔ انہوں نے کہا کہ:’یدی یورپا کی اکثریت نہ ہونے کے باوجود گورنر کے عہدے کا غلط استعمال کر کے حلف لینا اپنے آپ میں آئین کی خلاف ورزی ہے۔موجودہ حالات کا حوالہ دیتے ہوئے انہوں نے کہا کہ تین ممبران اسمبلی کے نااہل ٹھہرائے جانے کے بعد اسمبلی میں کل 221 رکن رہ گئے ہیں اور اس میں نصف کے اعداد و شمار 111 ہیں۔ اگرچہ بی جے پی کے پاس صرف 105 رکن اسمبلی ہیں۔سدا رمیا نے کہا کہ بی جے پی کو 111 ممبران اسمبلی کی فہرست سونپنی ہوگی۔ انہوں نے کہا کہ ممبئی میں رہ رہے باغی ممبران اسمبلی کے نام نہیں دیئے جا سکتے کیونکہ وہ کانگریس اور جے ڈی ایس سے ہیں۔سدا رمیا نے پوچھا کہ:’یہ (بی جے پی کی) آئینی یا اخلاقی طور پر قائم حکومت نہیں ہے، وہ (بی جے پی) تب اکثریت کس طرح ثابت کریں گے۔انہوں نے کہا کہ اگر کانگریس اور جے ڈ ی  ایس ممبران اسمبلی کو یرغمال نہیں بنایا جاتا تو ایچ ڈی کمارسوامی کی قیادت والی مخلوط حکومت نہیں گرتی۔کانگریسی لیڈر نے کہا کہ:’انہوں نے (بی جے پی نے) ہمارے ممبران اسمبلی کو لالچ دے کر غیر قانونی طور پر یرغمال بنایا اور اب وہ (بی جے پی) کہہ رہے ہیں کہ یہ لوگوں کی جیت ہے، نہیں، یہ لوگوں کی جیت نہیں ہے،بلکہ یہ خرید و فروخت کی جیت ہے‘۔