بھٹکل :7؍مارچ   (ایس اؤ نیوز ) شہر کے ہیبلے علاقے کی سرکاری ہائر کنڑا پرائمری اسکول تینگنگنڈی  میں قومی یوم ِ سائنس مناتےہوئے ’کلام سائنس لیباریٹری ‘ کا افتتاح کیاگیا۔

اسکول میں 28فروری 2024 بروز بدھ کو قومی یوم ِ سائنس کا پروگرام کا افتتاح  ہیبلے گرام پنچایت کی صدر شریمتی پاروتی نائک نے چراغ جلاتے ہوئے کیا۔ پروگرام کے ذریعے  طلبا و طالبات کے درمیان سائنس کےمتعلق بیداری پیدا کرنے اور عملی ترغیب دینےکی کوشش کی گئی ۔ یوم سائنس کی مناسبت سے دنیا کےمختلف ملکوں میں برسر روزگار  اسکول کے الومنی کی طرف سے دئیے گئے عطیہ سے ’’ہماری اسکول ، ہماری ذمہ داری ‘‘ کے تحت تعمیر کردہ ’’کلام سائنس لیباریٹری‘ ‘ کا الومنی کی ماؤں نے افتتاح کیا۔ جہاں بچوں کے لئے مختلف سائنسی آلات کے متعلق جانکاری اور تعلیم دی جائے گی۔ نمائش کا افتتاح کرنے کے بعد بی آر سی شریمتی پورنیما موگیر نے کہاکہ پرائمری اسکول میں سائنس لیباریٹری کی تعمیر بہت خوشی و مسرت کی بات ہے جس کے ذریعے بچوں میں سائنٹفک سوچ کو ترغیب دینے میں مدد ملے گی۔

پروگرام میں  اسکول بچوں کے درمیان منعقدہ کوئز، رنگولی اور مصوری مقابلہ جات میں حصہ لینے والوں کے درمیان انعامات کی تقسیم عمل میں آئی۔ اورالومنی کے والدین کی تہنیت بھی کی گئی ۔ بیٹکور کلسٹر کے سی آرپی جناب عبدالطیف شیخ، ایس ڈی ایم سی کے صدر شری دنیش موگیر ، صدرمدرس شری این ڈی موگیر اور پرائمری اسکول سنگھ کے صدر اُلّاس نائک ڈائس پر موجود تھے۔ استاد سی ڈی پڈوونے نے نظامت کے فرائض انجام دئیے تو استاد ڈی بی باڈکر نے شکریہ اداکیا۔