سرسی،30 / جنوری (ایس او نیوز) سرسی کے ٹی آر سی ہال میں ضلع جرنلسٹ ایسو سی ایشن کی گولڈن جوبلی تقریب کا افتتاح ضلع انچارج وزیر منکال وئیدیا کے ہاتھوں عمل میں آیا۔
    
اس موقع پر خطاب کرتے ہوئے وزیر منکال وئیدیا نے کہا کہ ضلع کی ترقی میں صحافیوں نے ہمیشہ سب سے زیادہ توجہ اور دلچسپی دکھائی ہے ، لیکن یہ لوگ بہت زیادہ مالی دشواریوں میں مبتلا رہتے ہیں ۔ اس لئے حکومت کی طرف سے جو بھی مالی ممکن ہو سکتا ہے ، اسے دلانے کے لئے میں وزیر اعلیٰ سے بات کروں گا ۔ دوسرے اضلاع کے صحافیوں کو جو سہولیات دستیاب ہیں ، اگر وہ سب سہولتیں ہمارے ضلع کے صحافیوں کو نہیں مل رہی ہیں تو میں انہیں دلانے کا کام کروں گا۔  
    
رکن اسمبلی بھیمنّا نائک نے صحافیوں کی معلومات والا کیلنڈر جاری کرتے ہوئے کہا کہ اتر کنڑا ضلع کے میڈیا نے جو خدمات انجام دی ہیں اس پر ہمیں فخر ہے ۔ مگر تعلقہ سطح پر صحافیوں کو مناسب سرکاری سہولتیں اور تعاون دستیاب نہیں ہوتیں ۔ تعلقہ سطح کے صحافیوں کو سرکاری سہولتیں دلانے کے لئے کوشش کی جانی چاہیے۔
    
سینئر صحافی جی یو بھٹ ہوناورنے کہا کہ آج بھی صحافیوں کو پیٹ پالنے کے لئے دوسرا ذریعہ معاش ڈھونڈنا پڑتا ہے ۔ صحت کا تحفظ، پینشن جیسی سہولتیں سرکار کی طرف سے صحافیوں کو ملنی چاہیے ۔ اس کے لئے منتخب عوامی نمائندوں کو کوشش کرنی چاہیے۔ 
    
جرنلسٹ ایسو سی ایشن کے ضلع صدر جی سبرایا بھٹ نے کہا کہ صحافیوں کے لئے ویلفیئر فنڈ اکٹھا کرکے ان کی صحت اور علاج و معالجہ کے ضمن میں تعاون فراہم کرنے کا فیصلہ جرنلسٹ ایسو سی ایشن نے کیا ہے۔ 
    
گولڈن جوبلی کی اس تقریب میں ایم ایل اے بھیمنّا نائک اور شیو رام ہیبار کے ہاتھوں بھٹکل کے راگھویندرا بھٹ ، منڈگوڈ کی شانتا کماری بیکنکوپّا، کمٹہ کے ایم جی نائک، یلاپور کے جئے راج ، اور جوئیڈا کے سندیش دیسائی کو سال 2023 کے لئے جی ایس اجّیبل ایوارڈ سے نوازا گیا ۔ اس کے علاوہ سماجی خدمت گار اننت مورتی ہیگڈے، سینئر صحافی ناگ راج ایلے گونڈی، کو کے شیام راو ایوارڈ تفویض کیا گیا۔
    
اس موقع پر ایسوسی ایشن کی جنرل سیکریٹری سومنگلا ہونّے کوپّا کے علاوہ مختلف کمیٹیوں کے کنوینرس اور عہدیداران موجود تھے۔