بی جے پی سے اتحاد پر جے ڈی ایس صدر سی ایم ابراہیم نے دکھایا سخت تیور؛اراکین نے کماراسوامی کو ہی پارٹی سے باہر کرنے کا کیا مطالبہ
بنگلورو، 17/اکتوبر (ایس او نیوز /ایجنسی) لوک سبھا الیکشن 2024 سے قبل بی جے پی کے ساتھ اتحاد کرنے سے متعلق جنتا دل سیکولر(جے ڈی ایس) میں بڑا اختلاف دیکھنے کومل رہا ہے۔ کرناٹک جے ڈی ایس کے سربراہ سی ایم ابراہیم نے کہا کہ جے ڈی ایس کی بی جے پی کے ساتھ کوئی مفاہمت نہیں ہوگی، جن لوگوں کو بی جے پی کے ساتھ مفاہمت کرنی ہے وہ پارٹی سے چلے جائیں، انہو ں نے یہ بھی کہا کہ پارٹی کے جس گروپ کی وہ قیادت کررہے ہیں وہی اصلی جنتا دل (ایس ) ہے۔ انہوں نے کہا کہ جنتادل (ایس) ہمیشہ سے سیکولر نظریات کی پابند رہی ہے اس سے انحراف کا سوال ہی نہیں اُٹھتا۔ جے ڈی ایس کے ریاستی صدر سی ایم ابراہیم نے واضح کیا کہ آنے والے لوک سبھا انتخابات میں جے ڈی ایس ، بی جے پی کی قیادت والی این ڈی اے کو ہرانے کے لئے کام کرے گی۔
جے ڈی ایس کی طرف سے بلائی گئی جنتن منتھن میٹنگ کے بعد اخبارنویسوں سے گفتگو کرتے ہوئے سی ایم ابراہیم نے کہا کہ جنتا دل (ایس) کی بنیادی نظریہ ہی سیکولرزم ہے، اس سے انحراف یا مصالحت پارٹی کے بنیادی نظریہ سے انحراف کے مترادف ہے۔ اور ایسا ہرگز نہیں ہونے دیا جائے گا۔ جے ڈی ایس کے ریاستی صدر ہونے کی حیثیت سے وہ جے ڈی ایس اور بی جے پی کے درمیان انتخابی اتحاد کے فیصلہ کو مسترد کرتے ہیں۔
سی ایم ابراہیم نے کہا ” جو لوگ ہمارے ساتھ آنا چاہتے ہیں وہ آجائیں، جس کو جانا ہے وہ جاسکتا ہے۔ ہم دیکھیں گے کہ کس کے پاس کتنے اراکین اسمبلی ہیں۔ میں کرناٹک جے ڈی ایس کا صدر ہوں۔ میں بی جے پی کے ساتھ اتحاد نہیں کروں گا۔ ہم (I.N.D.I.A) کے ساتھ بات کریں گے۔“
جب سی ایم ابراہیم سے پوچھا گیا کہ سابق وزیراعظم ایچ ڈی دیوے گوڑا پارٹی کے قومی صدرہیں تو آپ کیسے فیصلے لے سکتے ہیں؟ تو سی ایم ابراہیم نے کہا، ” دیوےگوڈا کے پاس تمل ناڈو، مہاراشٹر اورکیرلا نہیں ہے۔ میرے پاس کم ازکم کرناٹک تو ہے۔ ایسے میں دیوے گوڈا قومی صدرکیسے ہوسکتے ہیں؟ مزید کہا کہ دیوے گوڈا میرے والد کی طرح ہیں اورایچ ڈی کمارسوامی میرے چھوٹے بھائی جیسے ہیں۔ ایسے میں میں اُن سے یہی کہتا ہوں کہ وہ واپس پارٹی میں آجائیں۔“
پتہ چلا ہے کہ جنتن منتھن میٹنگ میں شریک لیڈران نے مانگ کی کہ سابق وزیراعلیٰ کماراسوامی اور ان کے فرزند نکھل کماراسوامی کو پارٹی سے نکال دیا جائے ۔ میٹنگ میں باپ بیٹوں کی امت شاہ سے ملاقات اور ریاستی پارٹی قیادت کو اس معاملہ میں اندھیرے میں رکھنے کی کوشش کی سخت مذمت کی گئی اور کہا گیا کہ اپنے ذاتی فائدے کے لئے پارٹی کے مفادات کو قربان کرنے کے جرم میں ان دونوں کو پارٹی سے نکال دینا چاہئے۔
واضح رہے کہ بی جے پی کے قومی صدر جے پی نڈا اورمرکزی وزیر داخلہ امت شاہ کے ساتھ 22 ستمبر کو نئی دہلی میں کرناٹک کے سابق وزیراعلیٰ ایچ ڈی کمارسوامی نے میٹنگ کی تھی۔ اس کے بعد جے پی نڈا نے سوشل میڈیا ایکس (ٹوئٹر) پرمیٹنگ کی تصویرشیئرکرتے ہوئے لکھا تھا کہ جے ڈی ایس کا این ڈی اے میں خیرمقدم ہے۔ کرناٹک کے سابق وزیراعلیٰ بی ایس یڈی یورپا نے بھی اعلان کیا تھا کہ جے ڈی ایس اوربی جے پی کے درمیان لوک سبھا کی سیٹوں کا معاملہ فائنل ہوگیا ہے۔