بنگلورو،29؍مارچ(ایس او نیوز) محکمۂ انکم ٹیکس کی طرف سے مختلف جے ڈی ایس اور کانگریس لیڈروں اور ان کے اقرباء کے ٹھکانوں پر انکم ٹیکس کے چھاپوں کا سلسلہ آج دوسرے دن بھی جاری رہا۔

ہاسن کے چن رائے پٹن میں تین مقامات پر آج صبح سویرے محکمۂ انکم ٹیکس نے وزیر برائے تعمیرات عامہ ایچ ڈی ریونا کے اقرباء کے ٹھکانوں کو نشانہ بنایا ان میں ایک کنٹراکٹر بھی شامل ہے۔ بتایا جاتاہے کہ چن رائے پٹن میں اشوتھ نارائن گوڈا ، نارائن ریڈی اور رائی گوڈا کے فرزند تمے گوڈا کے گھروں اور دفاتر پر انکم ٹیکس افسروں نے دھاوابولا ۔اس کے علاوہ بنگلور کے مختلف مقامات پر بھی آج چھاپے برابر جاری رہے ۔اس کے ساتھ ہی وزیراعلیٰ ایچ ڈی کمار سوامی کے قریبی سمجھے جانے والی بعض فلمی ہستیوں اور کنٹراکٹروں کے ٹھکانوں کو بھی آج نشانہ بنایا گیا۔ معتبر ذرائع نے بتایاکہ چھاپوں کے دوران جائیدادوں کے دستاویزات ، زیورات ، نقد رقم وغیرہ برآمد ہوئی ہیں۔ اگر اس سلسلے میں مالکوں نے مناسب دستاویزات اور ٹیکس کی ادائیگی کا حساب پیش کیا تو ان کی گھریلو املاک اور جائیداد کو کوئی نقصان ہونے نہیں دیا جائے گا۔

دوسری طرف آج شیموگہ میں شراوتی کے قریب سابق وزیراعظم ایچ ڈی دیوے گوڈا کے رشتے دار کے مکان پر بھی انکم ٹیکس افسروں نے چھاپے مارے اور تین گھنٹوں تک تلاشی کے بعد یہاں سے روانہ ہوگئے۔ وزیراعلیٰ ایچ ڈی کمار سوامی نے ان چھاپوں کی سخت مذمت کا سلسلہ آج بھی جاری رکھا اور کہاکہ خوفزدہ بی جے پی جتنے چاہے چھاپے مارے وہ ریاست میں انتخابات میں کامیابی حاصل کرنے والی نہیں ہے۔ انہوں نے کہاکہ قومی سطح پر بی جے پی نے لوٹ مار کا جو بازار گرم کررکھا ہے اس سے عوام کی توجہ کو ہٹانے کے لئے کرناٹک میں انکم ٹیکس کے چھاپوں کو اچھالا جارہا ہے۔

کمار سوامی نے کہاکہ بی جے پی کی طرح ریاست میں جے ڈی ایس یا کانگریس نے لوٹ کا بازار نہیں لگایا ہے بلکہ مخلوط حکومت اپنی ذمہ داریوں کو سمجھ کر ریاست کے ضرورتمندوں کی امنگوں کو پورا کرنے میں ہمہ وقت کوشاں ہے عوام میں اس حکومت کی بڑھتی ہوئی مقبولیت سے خوفزدہ بی جے پی عوام کو گمراہ کرنے کے لئے ایک طرف جھوٹ کا سہارا لے رہی ہے تو دوسری طرف انکم ٹیکس اور دیگر سرکاری ایجنسیوں کا اپوزیشن پارٹیوں کے خلاف غلط استعمال کرتے ہوئے ان سیاسی پارٹیوں کے کارکنوں اور عوام کے دلوں میں دہشت بٹھانا چاہتی ہے، اس مقصد میں بی جے پی قطعاً کامیاب نہیں ہوگی۔

انہوں نے کہاکہ کل سے محکمۂ انکم ٹیکس کے افسر جے ڈی ایس اور کانگریس کے متعدد لیڈروں کے ٹھکانوں پر چھاپوں کا سلسلہ جاری رکھا ہے لیکن اب تک یہ کیوں نہیں بتایا گیا کہ ان لوگوں کے ٹھکانوں سے کتنے کروڑ کی رقم برآمد ہوئی جو کالا دھن ہے۔ محکمۂ انکم ٹیکس اس معاملے میں اپنی جوابدہی نبھانے میں ناکام نظر آرہا ہے۔ ریاستی چیف کمشنر آف انکم ٹیکس بالا سبرامنیم کو آڑے ہاتھوں لیتے ہوئے کمار سوامی نے کہاکہ مرکز میں مودی کے دوبارہ اقتدار پر آنے کی صورت میں انہیں گورنر بنانے کا وعدہ کیاگیا ہے، جس کے لالچ میں آکر وہ بی جے پی کے سیاسی حریفوں کو ہراساں کرنے پر تلے ہوئے ہیں۔ انہوں نے کہاکہ محکمۂ انکم ٹیکس کی زیادتیوں پر جے ڈی ایس کی تحریک جاری رہے گی۔ کمار سوامی نے محکمۂ انکم ٹیکس سے کہا کہ چھاپوں کے دوران جو کچھ برآمد کیا گیا ہے اس کی تفصیل فوراً منظر عام پر لائے۔