گلبرگہ،17؍جنوری(ایس او نیوز) شہر کے علاقہ اوزا لے آؤٹ میں ایک شخص نے مبینہ طور پرگیس سیلینڈر سے اپنے بیوی کے سر پر حملہ کرتے اسے قتل کردیا۔ قتل کا واقعہ جمعرات کی رات پیش آیا مقتولہ کی شناخت 28سالہ آرتی راتھوڑ کی حیثیت  اور مبینہ قاتل شوہر کی شناخت تارا سنگھ راتھوڑ کی حیثیت سے کی گئی ہے۔ اس واقعہ کے بعد وہ اپنے دو بچوں کو ساتھ لے کر فرار ہوگیا ہے۔تفصیلات کے بموجب آرتی اور راتھوڑ کی 9سال قبل شادی ہوئی تھی۔ ملز م کے بارے میں کہا گیا ہے کہ وہ اپنی بیوی پر دباؤ ڈالا کرتا تھا کہ وہ اپنے والدین سے کہیں کہ وہ ان کے لئے ایک مکان تعمیر کرکے دیں۔ بار بار کے مطالبہ سے تنگ آکر والدین نے اسے رنگ روڈ، گلبرگہ کے قریب ایک گھر دلا دیاتھا۔ مقتولہ کی ماں نے پولیس بیان میں کہاہے کہ تارہ سنگھ گھر دلانے کے باوجود اس بات کا مسلسل مطالبہ کررہا تھا کہ مکان اس کے نام پر رجسٹر کروایا جائے۔ پھر جب آرتی جمعرات کی رات کو سنکرانتی کا تہوار منانے کے لئے اپنے والدین کے گھر جارہی تھی اس وقت اس کے شوہر نے پھر جھگڑا کرکے گیس سیلینڈر کے ذریعہ اس کے سر پر حملہ کرکے اسے شدیدزخمی کردیا۔ بہت زیادہ خون کے اخراج کے سبب یہ خاتون ہلاک ہوگئی۔

گلبرگہ یونیورسٹی پولیس اسٹیشن میں معاملہ درج کرلیا گیا  ہے اور پولیس نے ملزم کی تلاش شروع کردی ہے۔