بھٹکل سمیت اترکنڑا کے پانچ تعلقوں میں 10مارچ سے ہیسکام کی آن لائن خدمات بند :بل ادائیگی نہ کرنےپر نہیں ہوگا کوئی جرمانہ
کاروار:9؍مارچ (ایس اؤ نیوز ) کل یعنی10مارچ سے 19مارچ تک اترکنڑا ضلع کے بھٹکل سمیت کاروار، ڈانڈیلی ، کمٹہ اور سرسی میں ہیسکام بجلی بل ادائیگی خدمات بند ہوجائیں گی۔ اس کے علاوہ ان پانچ شہروں میں ہیسکام محکمہ کے ذریعے نئے کنکشن کے لئے آن لائن عرضی ، نام وغیرہ کی تبدیلی سمیت ہیسکام محکمہ کی کسی طرح کی کوئی بھی آن لائن خدمات میسر نہیں ہونگی۔ ہیسکام ہبلی کے افسر نے ا س بات کی جانکاری دی ۔
انہوں نے بتایاکہ ہیسکام محکمہ کی طرف سے10مارچ سے 19مارچ تک جوآن لائن خدمات بند کردی گئی ہیں وہ عارضی ہیں۔ ان خدمات سے صرف کاروار، سرسی، کمٹہ، ڈانڈیلی اور بھٹکل شہر ہی متاثر ہونگے بقیہ شہروں کانظام پہلے جیسا جاری رہےگا۔
مسئلہ کیاہے؟:سال 2008 میں مرکزی حکومت نے تیز رفتار بجلی ترقی پروگرام آر اے پی ڈی آرپی نظام جاری کیاتھا۔ اس منصوبے کے تحت 30ہزار سےزائد آبادی والے شہری علاقوں میں محکمہ ایندھن کے سافٹ وئیر اپڈیٹ، بجلی تاروں کی تبدیلی سمیت کئی سہولیات کو ترقی دی گئی تھی۔ اس آر اے پی ڈی آر پی منصوبے میں اترکنڑا ضلع کے کاروار، ڈانڈیلی ، سرسی ، کمٹہ اور بھٹکل شہر بھی شامل ہیں۔ اب محکمہ ایندھن کی طرف سےریاست کے سبھی ہسکام علاقوں میں آر اے پی ڈی آر پی نظام کے تحت ترقی دینا طئے کیاہے۔ اب یہ ترقیاتی کام متعلقہ شہروں میں 10مارچ سے 19مارچ تک کیاجارہاہےتو آر اے پی ڈی آر پی منصوبے میں شامل ان شہروں میں ہیسکام محکمہ کے بجلی بل ادائیگی سمیت مختلف آن لائن خدمات بند رہیں گی۔ 19مارچ کے بعد سافٹ وئیر شروع تو ہوجائے گا لیکن اس کو مکمل طورپر کام کرنےکےلئے 15دنوں کی ضرورت ہے تو اس دوران متعلقہ خدمات میں تھوڑا بہت رکاوٹ پیدا ہونےکی جانکاری ہبلی ہیسکام کے افسر نے دی ہے۔
بجلی بل کی ادائیگی نہیں ہوئی تو کنکشن کٹ نہیں ہوگا:محکمہ ایندھن کے سافٹ وئیر کی ترقی کئےجانے والے ان دنوں کےدوران ہیسکام کے گاہک بجلی بل ادانہیں کرتےہیں تو ان کا بجلی کنکشن نہیں کاٹاجائے گا۔ اس دوران میٹر ریڈر بجلی بل دیں گے ۔چونکہ اس دوران آن لائن خدمات بند رہیں گی اور فون پے، گوگل پے جیسےتھرڈ پارٹی ایپ کے ذریعے بھی بل ادائیگی ممکن نہیں ہوگی۔ اس دوران گاہک ہیسکام دفتر کے کاؤنٹر پر بل ادا کریں گے تو عام رسید دی جائےگی۔ آن لائن اپڈیٹ نہیں ہوگا۔ گاہکوں کو راحت دیتےہوئےکہاگیا ہےکہ اس دوران لیٹ چارجس اور جرمانہ عائد نہیں کیاجائےگا۔