بنگلورو،19؍جون(ایس او  نیوز) کل بنگلورو شہر میں ہو ئی موسلا دھار بارش کی وجہ سے جہاں نقصانات پیش آئے ہیں وہیں 3افراد ہلاک ہو چکے ہیں۔بارش کی وجہ سے شہر کی اکثر سڑکیں زیر آب آگئیں،جس کے سبب مسافروں کو کافی پریشانی کا سامنا کرنا پڑا،اور کئی مقامات پر املاک کو نقصان پہنچا ہے، نشیبی علاقوں کے کئی مکانوں میں پانی داخل ہو نے کی وجہ سے مکینوں کو رات جاگ کر گزارنی پڑی۔کے آر پورم اسمبلی حلقہ میں تیزہواؤں کے ساتھ ہوئی موسلادھار بارش کی وجہ سے متھن اور منی یما نامی دو افرادکی موت ہوگئی۔اس کے علاوہ تالاب میں ڈوب کر ایک شخص ہلاک ہو ا ہے۔کاویری نگر میں ایک دیوار گرنے سے منی ایما ہلاک ہو گئی۔ جبکہ مکان میں مو جود ایک اورشخص بری طرح زخمی ہوگیا۔مکان کے سامنے کھڑی کی گئی مو ٹرسائیکل کو پانی میں بہتے دیکھ کراس کو روکنے کی کوشش میں متھن نامی نوجوان اپنی جان گنوابیٹھا۔

کل رات ہو ئی موسلا دھار بارش کی وجہ سے نالے سے قریب میں کامپاؤنڈ کی دیوار مکان کے سامنے کھڑی کی گئی موٹر سائیکل پر گر پڑی تھی۔ اس دوران نالے کے آلودہ پانی میں موٹر سائیکل بہتے دیکھ کر تین نوجوانوں نے نالے سے گاڑی کو نکالنے کی کوشش کی اس دوران متھن پانی میں بہہ گیا۔مقامی افراد نے پو لیس اور بروہت بنگلور مہا نگر پا لیکے(بی بی ایم پی) افسران کو اطلاع دی۔اطلاع پا کر فائر بریگیڈ عملہ اور این ڈی آر ایف کے جوان موقع پر پہنچ کر کافی دیر تک تلاش کرنے کے بعد لاش کو باہر نکا لا۔ بسونا پورہ وارڈکے گائیتری لے آؤٹ9کراس کے مقیم سیول انجینئر متھن شیموگہ کا رہنے والا تھا۔کل درمیانی شب ہوئی موسلادھار بارش کی وجہ سے کے آر پورم اور مہا دیوپورہ میں 90سے180 ملی میٹر بارش ہو ئی ہے، جس کی وجہ سے250سے زائد مکانوں میں پانی داخل ہو چکا ہے،جس سے مکانوں کا ساز وسامان پانی میں بہنے لگے۔کلکیرے دیہات بارش کی وجہ سے زیر آب آگیا۔ یہاں کے 20مکانوں میں پانی داخل ہونے کی وجہ سے مکینوں کو کافی پریشانی اٹھانی پڑی۔کرشنا سنیما گھر کی دیوار گرنے سے24دو پہیہ والی گاڑیوں کو نقصان پہنچا ہے۔آج صبح مقامی رکن اسمبلی وریاستی وزیر بیرتی بسواراج نے متاثرہ علاقوں کا دورہ کیا۔

اس موقع پر انہوں نے اخباری نمائندوں کو بتا یا کہ اس علاقہ میں راج کالوے کا تعمیری کام جاری ہے جس کی وجہ سے کافی ملبہ جمع ہو گیا ہے اور اس کے نتیجے میں پانی کے بہاؤ میں رکاوٹیں پیدا ہو چکی ہیں۔انہوں نے بتا یا کہ وہ راج کالوے کے تعمیری کاموں کو جلد از جلد مکمل کرنے کی بی بی ایم پی افسران کو ہدایت دی ہے۔اس کے علاوہ ریاست کے بلاری، چامراج نگر، بنگلور دیہی،بنگلور شہری،چکبالاپور،چکمگلور،ہاسن،کورگ،کولار، میسور، رام نگرم، شیموگہ،ٹمکور،منڈیا اضلاع میں بھی موسلا دھار بارش ہو ئی ہے۔مذکورہ اضلاع میں یلو الرٹ کا اعلان کیا گیا ہے۔