شدید بارش کے بعد منگلورو سنٹرل ریلوے اسٹیشن تالاب میں تبدیل
منگلورو، 19/جولائی (ایس او نیوز) منگلورو شہر میں جمعرات کو موسلادھار بارش ہوئی اور نشیبی علاقوں میں سیلاب جیسی صورتِ حال پیدا ہوگئی۔ خاص طور پر سے قلب شہر میں واقع سنٹرل ریلوے اسٹیشن تالاب میں تبدیل ہوگیا۔ اطلاعات کے مطابق ٹرین خدمات غیر متاثر رہیں۔ مگر اسٹیشن میں داخلے کا راستہ زیر آب آنے سے مسافرین کے پاس گھنٹوں تک پانی میں چل کر پلیٹ فارمس تک پہنچے کے علاوہ کوئی راستہ نہیں تھا۔ ریلوے میل سرویس (آر ایم ایس) دفتر جہاں خطوط اوردیگر سامان رکھا جاتا ہے، میں بھی بارش کا پانی داخل ہوگیا۔ ملازمین کو سامان بچانے کے لیے جدوجہد کرنی پڑی۔ سیلاب کا پانی اسٹیشن کی عمارت میں بھی داخل ہوگیا۔ ریلوے اسٹیشن کے عہدیداروں نے منگلورو سٹی کارپوریشن پر نالوں کی مناسب صفائی نہ کرنے کا الزام عائد کیا۔ واضح رہے کہ گزشتہ سال منگلورو کے کئی حصوں میں شدید سیلاب آگیا تھا اور ریلوے اسٹیشن میں ان کئی مقامات میں شامل تھا جہاں بارش کا پانی داخل ہوگیا تھا۔