معروف سماجی خدمت گارٹیسٹا سیتلو ادکو گجرات اے ٹی ایس نے کیا گرفتار؛ ممبئی سے لے گئے گجرات؛ ٹیسٹا نے اپنی گرفتاری کوغیر قانونی قراردیتے ہوئے ممبئی پولیس میں درج کروائی شکایت
ممبئی(ایس او نیوز/ایجنسی ): گجرات فساد کی وسیع تر سازش کیس سے متعلق ذکیہ جعفری کی پٹیشن سپریم کورٹ سے مسترد ہوتے ہی گجرات اے ٹی ایس سرگرم ہوگئی اور سنیچر کو اس نے معروف سماجی خدمت گار اور گجرات فساد میں مجرموں کو سزا دلوانے کیلئے کوشاں رہنے والی ٹیسٹا سیتلواد کو ممبئی کے جو ہو میں واقع ان کی رہائش گاہ سے حراست میں لے لیا۔
سنیچر کی دو پہر کواے ٹی ایس کے اہلکار ، جن میں ۲ لیڈیز بھی تھیں ، جوہو میں واقع ان کے گھر پہنچے اور ان کو اپنی تحویل میں لے کر سانتا کروز پولیس اسٹیشن لے گئے۔ یہاں ضابطوں کی خانہ پری کے بعد اے ٹی ایس کی ٹیم ٹیسٹا سیتلواد کو لے کر احمد آباد روانہ ہوگئی ۔
اس بیچ اپنی گرفتاری کو غیر قانونی قرار دیتے ہوۓ ٹیسٹا سیتلواد نے بھی سانتا کروز پولیس اسٹیشن میں گجرات پولیس کے خلاف شکایت درج کرائی ہے۔
ٹیسٹا کے شوہر جاوید آنند نے اخبارنویسوں کو بتایا کہ ٹیسٹا سیتلواد اور کچھ اور لوگوں کے خلاف جن میں سابق آئی پی ایس افسر سنجیو بھٹ اور آر بی سری کماربھی شامل ہیں، گجرات اے ٹی ایس نے ایف آئی آر درج کی ہے اور اسی کے تحت ان کو لے جایا گیا ہے۔ جاوید آنند کے مطابق ٹیسٹا کو پہلے سانتا کروز پولیس اسٹیشن لے جایا گیا، اس کے بعد ان کواے ٹی ایس ٹیم احمد آباد لے کر روانہ ہوئی۔ جاوید آنند نے اے ٹی ایس ٹیم کے گھر پہنچنے کے تعلق سے بتایا کہ سنیچر کی صبح سے ہی متعدد جگہوں سے فون آرہے تھے کہ ٹیسٹا سیتلواد کہاں ہیں، ان کی سیکوریٹی وغیرہ کون دیکھ رہا ہے؟ ہمیں اندازہ ہوگیا تھا کہ کچھ گڑ بڑ ہے اور یہ اندازہ اس وقت یقین میں بدل گیا جب گجرات اے ٹی ایس کے اہلکار گھر پر پہنچ گئے۔
ہم نے تمام گیٹ بند کر دیئے تھے لیکن اے ٹی ایس کے ایک مرداور ایک خاتون افسر بیڈ روم تک پہنچ گئے۔ اس دوران ٹیسٹا نے بار بار کہا کہ وہ اپنے وکیل کے ہمراہ ان کے ساتھ چلیں گی لیکن انہوں نے موقع نہیں دیا اور زبردستی پولیس اسٹیشن لے گئے ۔ جاوید آنند کے مطابق” ذکیہ جعفری کی عرضی خارج ہونے کے بعد ہی اندازہ ہوگیا تھا کہ اب شاید کچھ ہوگالیکن یہ بالکل اندازہ نہیں تھا کہ اے ٹی ایس اہلکار وفاداری کا مظاہرہ کرتے ہوۓ عرضی خارج ہونے کے چند گھنٹے بعد ہی ہمارے گھر پہنچ جائیں گے۔“