میسورو،30/اگست (ایس او نیوز/ایجنسی) کرناٹک میں کانگریس نے  الیکشن سے پہلے  عوام الناس سے جن  پانچ گیارنٹی اسکیموں کا وعدہ کیا تھا، اُس میں سے ایک گروہا لکشمی اسکیم کا آج بدھ کو  میسور میں  شاندار افتتاح کیا گیا۔ دوپہرقریب ایک بجے   کانگریس قائد راہول گاندھی نے چراغ جلا کر اس اسکیم کا افتتاح  کیا، پھر  ٹیبلیٹ کا ایک بٹن دبا کر اس اسکیم کے تحت خواتین سربراہ کے بینک اکاونٹ میں رقم جمع کرائی گئی۔ اس اسکیم کے تحت  ہرخاندان کی خاتون سربراہ کو ہر ماہ 2000 روپے کی رقم اُن کے بینک اکاونٹ میں  جمع کرائی جائے گی۔

اس موقع پر مہمان خصوصی کے طور پر تشریف فرما کانگریس قائد راہول گاندھی نے  خطاب کرتے ہوئے کہا کہ  کرناٹک پورے ملک کو راستہ دکھارہا ہے، اس موقع پر  انہوں نے اعلان کیا کہ  ہم یہ پانچوں اسکیمیں  پورے ملک میں لاگو کرنا چاہتے ہیں، انہوں نے بی جے پی حکومت پر نشانہ سادھتے ہوئے کہا کہ کانگریس  ملک کے عوام سے اگر کوئی وعدے کرتی ہے تو اُسے پورا کرتی ہے، ہم نے  انتخابات سے پہلے   کرناٹک کے عوام سے پانچ وعدے کئے تھے،اورہم نے  تمام وعدوں کو پورا کرکے دکھایا۔ 

راہول گاندھی نے کہا کہ  آج ہم   یہاں میسور میں گروہا لکشمی اسکیم کے افتتاح کے بعد  ٹیبلیٹ کا ایک بٹن دباکر  ایک ساتھ   ایک کروڑ سے زائد  خواتین کے اکاونٹ میں  دو ہزار روپیہ جمع کرایا ہے۔ جیسے آج ہوا، اسی طرح ہر ماہ  خواتین کے بینک اکاونٹ میں  دو، دوہزار روپیہ جمع  کرائی جائے گی۔ یہ ہماری اورریاستی  کانگریس حکومت کی گیارنٹی ہے۔ ہم نے آپ سے کہا تھا کہ انتخابات کے بعد خواتین کو بسوں پر جانے  کے لئے ٹکٹ نہیں دینی ہوگی، اس اسکیم کا نام شکتی تھا، ہم نے اُس وعدے کو بھی پورا کردکھایاہے، آج کرناٹک میں خواتین کو بس پر سفر کرنا ہے تو ٹکٹ کی ضرورت نہیں ہے، انا بھاگیہ اسکیم کے تحت مستحق لوگوں کو   دس کلو چاول دیا جارہا ہے، گروہا جیوتی اسکیم کے تحت  دو سو یونٹ مفت بجلی فراہم کی جارہی ہے۔ آپ ہمارے پانچوں اسکیموں کو دیکھ لیں، ایک اسکیم کو چھوڑ کر تمام چار اسکیمیں خواتین کے لئے بنائے گئے  ہیں۔ ایک اسکیم یووا   نیدی اسکیم گرائجویٹ اور ڈپلوما کئے ہوئےبے روزگار نوجوانوں کو  مالی تعاون دیاجارہا ہے  اس ایک اسکیم کو چھوڑ کر سبھی تمام اسکیمیں خواتین کے لئے ہے۔

راہول گاندھی  نے  خواتین کو چار چار اسکیموں کے ذریعے  اُنہیں خودمختاربنانے کا مقصد واضح کرتے ہوئے بتایا کہ  بڑے  سے بڑا پیڑ  جڑ کے بغیر کھڑا نہیں ہوسکتا، اگر جڑ مضبوط ہوتی ہے تو کتنا بڑا طوفان اور  اندھی آجائے وہ نیچے نہیں  گرسکتا،  اسی طرح بنیاداگر مضبوط ہوگی تو اُس پر تعمیر عمارت بھی اُتنی ہی مضبوط ہوگی۔ ہم نے  بھارت جوڑو یاترا میں ہزاروں لوگوں سے ملاقات کی، کرناٹک میں ہم نے  چھ سو کلومیٹر پیدل یاترا کیا اور آپ لوگوں سے بات چیت کی، اور اس یاترا سے مجھے معلوم ہوا کہ  پٹرول، ڈیزل، گیس سلینڈر تمام کا مسئلہ خواتین  سے جُڑا ہوا ہے۔ہزاروں خواتین نے کہا کہ ہم مہنگائی کو قابو میں نہیں کرپارہے ہیں،  خواتین   ہی گھر کی جڑ ہے، کرناٹک ہماری ماتاوں اور بہنوں کےبغیر کھڑا نہیں ہوسکتا۔ پروگرام میں شریک ہزاروں خواتین سے راہول گاندھی نے کہا کہ  آپ  ہی اس ریاست کی جڑ ہیں ، جس طرح  پیڑ کی جڑ نظر نہیں آتی، اسی طرح  گھرسنبھالنے والی خواتین بھی  نظر نہیں آتی ،  لیکن آپ ہی کی وجہ سے گھر چلتا ہے۔ انہوں نے کہا کہ  ریاست کے 12 ہزار جگہوں پر ایک ساتھ اس پروگرام کا افتتاح ہوا ہے اور پوری ریاست میں لاکھوں کی تعداد میں خواتین  اس  پروگرام کا لائیو دیکھ رہی ہیں۔ 

اس موقع پر گفتگو کرتے ہوئے  ڈپٹی وزیراعلیٰ ڈی کے شیوکمار نے بتایا کہ  کانگریس نے عوام سے پانچ گیارنٹیوں کا اعلان کیا تھا اور کانگریس حکومت کے اقتدار میں آکر اب سو دن ہورہے ہیں اور ہم عوام سے کئے ہوئے تمام پانچوںوعدوں کو  پورا کرکے دکھایا ہے۔ انہوں نے کہا کہ  گروہا  لکشمی اسکیم کے تحت ہر گھر کی  سربراہ خاتون  کو دو ، دو ہزار روپیہ راست اُن کے بینک اکاونٹ میں جمع کرائے جائیں گے۔ انہوں نے کہا کہ  ریاست کی ایک کروڑ دس لاکھ خواتین کو اس  اسکیم سے فائدہ اُٹھارہے ہیں۔