کاسرگوڈ 16/اکتوبر (ایس او نیوز) مینگلور ۔ کاسرگوڈ نیشنل ہائی وے پر  ایل پی جی سے بھرا ہوا یک بلیٹ ٹینکر اُلٹ جانے کے نتیجے میں  ٹینکر سے گیس کے اخراج سے پورے علاقے میں خوف و دہشت کا ماحول پیدا ہوگیا۔ حادثہ کاسرگوڈ   ٹاون سے ایک کلومیٹر دور  اڈکا تھ بیل  نیشنل ہائی وے 66 پر بدھ کی صبح پیش آیا۔

 حادثے کی اطلاع ملتے ہی پولیس اور کیرالہ فائر اینڈ ریسکیو سروسس کی ٹیمیں موقع پر پہنچ گئیں۔ پورے علاقے میں لوگوں کو گھروں سے نکال کر محفوظ مقامات پر منتقل کیا گیا۔ علاقے میں بجلی منقطع کرنے کے علاوہ اس سڑک پر ٹریفک کو پوری طرح معطل کردیا گیا۔اور سواریوں کومختلف متبادل راستے اختیار کرنے کی ہدایات جاری کردی گئیں۔ فائر سروس والوں نے اُلٹ کر گرے ہوئے ٹینکر پر پانی کاچھڑکاؤ شروع کیا تاکہ آگ بھڑکنے کے خطرے کو کم کیا جاسکے۔مزید بر آں اس علاقے میں موجود اسکول کو چھٹی دے دی گئی۔

 متعلقہ گیس کمپنی کے افسران موقع پر پہنچنے کے بعد الٹ کر گرے ہوئے ٹینکر سے بحفاظت دوسرے ٹینکر میں گیس منتقل کرنے اور سڑک سے اس ٹینکر کو ہٹانے کے اقدامات کیے  گئے۔